Հայ-թուրքմենական հարաբերությունները կայուն հավասարակշռության վիճակում են․ Թուրքմենստանում ՀՀ դեսպան
Թուրքմենստանում Հայաստանի Հանրապետության դեսպան Արսեն Ավագյանի բնորոշմամբ՝ Երևանի ու Աշխաբադի միջև այսօրվա հարաբերությունները փոխադարձ հարգանքի վրա հիմնված կայուն գործընկերության օրինակ են։
«Արմենպրես»-ի հաղորդմամբ՝ Թուրքմենստանում ՀՀ դեսպանը նման տեսակետ է արտահայտել News Central Asia-ի հետ հարցազրույցում։
ՀՀ դեսպանը հարցազրույցում նաև ներկայացրել է երկկողմ համագործակցության զարգացման ճանապարհային քարտեզի տեսլականը՝ ավանդական արդյունաբերությունից և տրանսպորտից մինչև արհեստական բանականության և բարձր արդյունավետության հաշվարկների ոլորտում ռազմավարական նախագծեր:
Բնութագրելով Հայաստանի ու Թուրքմենստանի միջև հարաբերությունների ներկա պատկերը՝ դեսպան Ավագյանը նշել է, որ հարաբերությունները բնութագրվում են կայունությամբ, կանխատեսելիությամբ և փոխադարձ հարգանքով։ Դրանք զերծ են քաղաքական անկայունությունից և կառուցված են ամուր իրավական շրջանակի, ինչպես նաև միջազգային կարևորագույն հարցերի շուրջ փոխըմբռնման վրա։
«Հայաստանը և Թուրքմենստանը հետևողականորեն ցուցաբերում են հարգանք ինքնիշխանության, ներքին գործերին չմիջամտելու և պետությունների հավասարության սկզբունքների նկատմամբ։ Թուրքմենստանի միջազգայնորեն ճանաչված կարգավիճակը՝ որպես մշտապես չեզոք պետություն, առանձնահատուկ նշանակություն ունի երկկողմ համատեքստում։ Թուրքմենստանի չեզոքությունը չի ենթադրում մեկուսացում, այլ միջազգային գործընթացներին մասնակցության հատուկ մոդել՝ հիմնված շահերի հավասարակշռման և խաղաղ նախաձեռնությունների խթանման վրա։ Այս առումով տարածաշրջանային կայունության և խաղաղ զարգացման նկատմամբ մեր մոտեցումները մեծ մասամբ համընկնում են»,-ասել է դեսպան Ավագյանը։
Դեսպանի խոսքով՝ քաղաքական երկխոսությունը պահպանվում է կանոնավոր հիմունքներով, իսկ երկու պետությունների ղեկավարների, խորհրդարանական մարմինների և արտաքին քաղաքականության նախարարությունների մակարդակով շփումները նպաստում են վստահության մթնոլորտի ձևավորմանը։
«Վստահությունը իր հերթին հիմք է տնտեսական և մարդասիրական ոլորտներում համագործակցության խորացման համար»,-նշել է նա։
Դեսպան Ավագյանը մատնանշել է, որ տնտեսական համագործակցությունը դեռևս լիովին չի արտացոլում երկու երկրների ներուժը, այնուամենայնիվ, կարևոր է, որ առևտրի ցածր ցուցանիշները չեն վկայում թույլ հարաբերությունների մասին, այլ ավելի շուտ դրանք մատնանշում են լոգիստիկայի և աշխարհագրության հետ կապված կառուցվածքային սահմանափակումները, ինչպես նաև բիզնես համայնքի հետ ավելի համակարգված համագործակցության անհրաժեշտությունը։
Դեսպանի խոսքով՝ տնտեսական կապերը զարգացնելու քաղաքական կամք կա, և դա հիմնարար նշանակություն ունի։
«Հարաբերությունների մարդասիրական կողմը արժանի է հատուկ ուշադրության: Մարդասիրական և մշակութային կապերը նպաստում են բարի կամքի և փոխադարձ հարգանքի մթնոլորտի ստեղծմանը, որը հաճախ ոչ պակաս կարևոր է, քան պաշտոնական դիվանագիտությունը։
Ավելի լայն առումով հայ-թուրքմենական հարաբերությունները ներկայում գտնվում են կայուն հավասարակշռության վիճակում՝ զարգացման ավելի դինամիկ փուլ անցնելու ներուժով: Մենք ունենք հասուն քաղաքական հիմք և դրական մթնոլորտ, որը բարենպաստ պայմաններ է ստեղծում առևտրի, տրանսպորտի, էներգետիկայի, նորարարության և գիտական համագործակցության ոլորտներում գործընկերության խորացման համար»,-շեշտել է դեսպանը։
Նա նաև հավելել է, որ երկկողմ հարաբերությունների ներկա վիճակը կարելի է բնութագրել որպես կայուն, կենտրոնացած կառուցողական և համագործակցության աստիճանական ընդլայնման վրա:
«Հաջորդ տրամաբանական քայլը քաղաքական վստահության վերափոխումն է ավելի մեծածավալ տնտեսական և տեխնոլոգիական նախագծերի»,-ընդգծել է ՀՀ դեսպանը։
