«2025-ի ներգաղթը արտաքին և տարածաշրջանային փոփոխությունների, ոչ թե «խաղաղության» արդյունք է». Շաքե Իսայանը՝ ՆԳ նախարարին

ԱԺ նախկին պատգամավոր, «Առաջարկ Հայաստանին» նախաձեռնության անդամ Շաքե Իսայանը հակադարձում է ՆԳ նախարարի պնդմանը, թե «ներգաղթ ենք գրանցել, և դա խաղաղության արդյունք է»։

«ՆԳ նախարարի այն պնդմանը, թե «անկախացումից ի վեր առաջին անգամ 2025-ին ներգաղթ ենք գրանցել, և դա խաղաղության արդյունք է», թույլ տվեք չհամաձայնել՝ առնվազն երկու կարևոր պատճառով։

Առաջին՝ ներգաղթը չի կարելի բացատրել մեկ գործոնով։ Միգրացիոն հոսքերը ձևավորվում են բազմաթիվ արտաքին պայմանների ազդեցությամբ։ Օրինակ՝ Դոնալդ Թրամփի տարիների ձևավորված և հետագայում փոփոխված միգրացիոն քաղաքականությունները սահմանափակել են դեպի ԱՄՆ արտագաղթի հնարավորությունները, ինչը բնականաբար ազդում է մարդկանց ընտրության վրա։

Երկրորդ՝ մեծ ազդեցություն ունեն տարածաշրջանային զարգացումները։ Ռուս-ուկրաինական պատերազմի հետևանքով կտրուկ նվազել է դեպի ՌԴ մեկնողների հոսքը, իսկ Ուկրաինա ուղղությունն ընդհանրապես փակվել է։ Այս պայմաններում միգրացիոն ուղղությունների փոփոխությունը բնական է և կարող է ստեղծել ներհոսքի տպավորություն։

Ի հաստատումն իմ ասածների, բավական է դիտարկել վերջին տարիների ԱՄՆ «Green Card»-ի խաղարկության տվյալները և կտեսնենք, որ արտագաղթի պահանջարկը էապես չի փոխվել։ Սա ցույց է տալիս, որ մարդկանց հիմնական մոտիվացիաները նույնն են մնացել, պարզապես փոխվել են հնարավորությունները՝ պայմանավորված տեխնիկական և աշխարհաքաղաքական գործոններով։

Ուստի 2025-ի ներգաղթը ավելի ճիշտ է դիտարկել որպես արտաքին և տարածաշրջանային փոփոխությունների արդյունք, այլ ոչ թե ներկայացնել այն որպես «խաղաղության» հետևանք»,- գրել է Շաքե Իսայանը։