Գեղարքունիքն իշխանական է, քանի որ էս 4-5 տարում ստեղ ոչ մի ընդդիմադիր չի եկել․ «Հրապարակ»
«Հրապարակ» թերթը գրում է․
««Մեր գլխին տեղ ունես», «Ոտքդ պաքեմ», «Առանց քեզ մենք ոչ մի բան ենք»․ իրենց մարզ այցի գնացած Նիկոլ Փաշինյանին այս եւ այլ ինքնաստորացուցիչ արտահայտություններով էին դիմում Գեղարքունիքի՝ Գավառի, Մարտունու բնակիչները, ծափ էին տալիս, շողոքորթում, համբուրում ձեռքը, փաթաթվում: Նրանք մոռացել են 2023 թվականի Սոթքի, Նորաբակի կրակոցները, Սեւանի ու Արեւմտյան Ադրբեջանի վերաբերյալ Ալիեւի ռազմատենչ հայտարարությունները նրանց չեն հետաքրքրում: Գավառում մի կին նույնիսկ ողջունեց դելիմիտացիայի գործընթացը․ «Վերջապես պետական սահման ունենք, գծի, վարչապետ ջան, ոնց գծես, տենց էլ կլինի»: Ի՞նչ Արցախ, ի՞նչ Արարատ, ի՞նչ Եկեղեցի, ի՞նչ ցեղասպանության ժխտում: Անգամ սոցիալական պահանջներ քչերը դրեցին: Մի տարեց տղամարդ Գավառում միայն շշպռեց Փաշինյանին, թե 20 տարի է` իրեն չեն բուժել, դեռ առողջապահության նախարար Թորոսյանին է նամակ գրել, պատասխան չի ստացել, իսկ իր քաղցկեղը խորացել է ու վտագավոր` 4-րդ աստիճանի է հասել: Փաշինյանը դժգոհ քաղաքացիների չի սիրում եւ տարեցին արագ «գլխից ռադ արեց»` գցելով Անահիտ Ավանեսյանի վրա, ապա վերջինս չքվեց Նիկոլի կամերայի տեսադաշտից: Բայց ծերունու ձայնը մնաց կադրում։ «Եթե սենց գնաց, չես նստելու»,- Փաշինյանին զգուշացնում էր տարեց մարդը:
«Հանդիպումներից ստացած ամենացավալի տպավորությունն այն է, որ ոչ մեկին չէին բերել։ Նիկոլի հետ հանդիպողների մեծամասնությունն ինքնակամ էր եկել, ու բոլորն անձնական հարցեր էին տալիս»,- ասում է զրուցակիցս։ Ինչո՞ւ՝ հարցնում եմ նրան, որը նախկինում ընդդիմություն էր, հետո մի շրջան պետական աշխատող դարձավ, բայց չհամակերպվեց ՔՊ-ականների հետ ու ազատվեց աշխատանքից: «Գեղարքունիքում Փաշինյանը լավ ձայն ա տանելու` մի 52 տոկոս։ Պատճառը, իմ կարծիքով, ընդդիմության թերությունն է: Ընդդիմադիրներին խլացնում են տեղական մակարդակում: Այսինքն, եթե ընդդիմադիր չի գալիս, մնում է միակ հույսը իշխանությունը: Նա էլ, ի դեմս մարզպետի, ինչ-որ օգնություններ, կրած վնասի փոխհատուցումներ է տալիս: Իրենք հասկանում են, որ վաղը հայրենիք չեն ունենալու, որ սրանք հայրենիքը ծախում են, բայց երբ ասում ես մարդկանց էդքանը, հիշացնում են՝ անցյալ ընտրությանը ձայն տվեցինք, ի՞նչ եղավ: Եվ իրոք՝ էս 4-5 տարում ստեղ ոչ մի ընդդիմադիր չի եկել»,- ասում է նախկին պաշտոնյան, որի անունն իր խնդրանքով չենք հրապարակում: Նա իր համերկրացիների նիկոլապաշտության սեփական բացատրությունն ունի` հիմնական պատճառը Հ1-ն է, «Լրաբերը», ինչպես մինչ օրս վարդենիսցիներն անվանում են Հանրայինի լուրերը:
«Հ1-ն իրենց նորությունների հիմնական աղբյուրն է: Բայց պետք է հասկանալ, որ խոսքը տարեց բնակչության մասին է: Հիմա Գեղարքունիքի բնակչության մեծ մասը տեղափոխվել է, այստեղ հիմնականում տարեցներն են մնացել, գյուղերը մնացել են ծերերի վրա: Իրենց անասունը նայեցին, մտան տները, Հ1-ը միացրեցին, նստեցին: Իսկ ջահելությունը Նիկոլին չի ընդունում, բայց ջահելությունը հիմնականում գյուղերում չէ: Ամեն 10 ջահելից 1-ն է Նիկոլին ընդունում: «Լայվերում», եթե նկատում եք, հիմա միայն տարիքովներն են»:
Ոմանք հեռանում են ՔՊ-ից, ոմանք էլ, ինչպես Վարդենիս խոշորացված համայնքի քաղաքապետ Ահարոն Խաչատրյանը, մտնում են ՔՊ: Նա ՔՊ անդամ է դարձել մոտ երկու շաբաթ առաջ:
Հիշեցնենք, որ Վարդենիսում նա համայնքապետ ընտրվեց 2021 թվականի դեկտեմբերին` որպես ընդդիմադիր: «Ահարոն Խաչատրյան» դաշինքը, որը 10 ձայն էր ստացել, միավորվեց քոչարյանական «Միասնական Վարդենիս» դաշինքի հետ, եւ 1 մանդատի առավելությամբ համայնքապետ ունեցան: Ահարոն Խաչատրյանին հեշտ չէր կառավարել քաղաքը: Անգամ բանալիներն էին նրանից գողացել, ու երդմնակալությունը բակում կատարեց: Ընդդիմադիր լինելով, նա հայտարարում էր, որ պետք է լեզու գտնի իշխանության հետ` հանուն համայնքի զարգացման, ասում էր. «Ինչի՞ համար պիտի դառնամ ՔՊ-ի կամակատար։ Ես քաղաքականության մեջ ընդհանրապես չկամ»: Ու մեկ էլ հանկարծ մտավ ՔՊ: Ինչո՞ւ: Արդյո՞ք կոտրվեց այն բանից հետո, երբ քրեական գործ հարուցեցին իր դեմ: Ասում են՝ մոտ շրջապատում Ահարոն Խաչատրյանը հայտարարել է՝ 60 տարեկան մարդ եմ, գնայի նստեի՞, կա՛մ պետք է հրաժարական տայի, կա՛մ պետք է նստեի: Ուզում էինք նրան մի քանի հարց տալ, բայց Վարդենիսի համայնքապետն արդեն 2-3 ամիս է՝ չի պատասխանում լրագրողների զանգերին: Երեւի չգիտի ինչ պատասխանի, մամուլի քարտուղար էլ չունի: Նրա փոխարեն քաղաքապետի բջջայինին պատասխանում է օգնականը:
- Խնդրում եմ խոսափողը փոխանցել Ահարոն Խաչատրյանին, թե՞ նա սկզբունքորեն չի պատասխանում լրագրողներին:
- Համայնքի ղեկավարը զբաղված է, ոչ մեկից էլ կտրված չէ, ուղղակի զբաղված է, եթե ես կարող եմ պատասխանել` կպատասխանեմ:
- Ուզում էի իմանալ՝ ի՞նչ եղավ կոալիցիան: Նա քոչարյանականների հետ կոալիցիա կազմեց, դարձավ համայնքապետ, բայց հիմա ՔՊ-ական է, դա ո՞նց եղավ:
- Ես նման հարցերի իրավասու չեմ պատասխանել:
- Ինչպե՞ս եղավ, որ Գեղարքունիքում, որտեղ բախումներ, լարվածություն է եղել ադրբեջանցիների հետ, մարդիկ ոչ մի անվտանգային հարց չտվեցին Փաշինյանին, Դուք` որպես մարզի բնակիչ ու քաղաքապետի օգնական, դա ինչպե՞ս եք բացատրում:
- Ես իրավասու չեմ անվտանգային եւ քաղաքական հարցերի պատասխանելու: Ոռոգման ջուր, խմելու ջուր, ասֆալտ` եթե հարցեր կան, տվեք, խնդիր չկա:
Մեր տեղեկություններով, երեկ «Ահարոն Խաչատրյան» եւ «Միասնական Վարդենիս» դաշինքը լուծարելու որոշում է ընդունվել, քանի որ աբսուրդ է, որ Ահարոն Խաչատրյանը ՔՊ-ական է, բայց ընդդիմադիր կոալիցիայի անդամ:
Մանրամասները՝ թերթի այսօրվա համարում
