ՄՈԲ-ը համատեղում է բանակի մարտունակությունն ու երկրի կենսունակությունը՝ ապահովելով անվտանգություն ցանկացած իրավիճակում

Հայաստանի Զինված ուժերում մոբիլիզացիոն ռեսուրսների բաշխումը կարևոր գործընթաց է, որի միջոցով կազմակերպվում է զինվորական հաշվառումն ու զորակոչը՝ ապահովելով պահեստազորայինների պատրաստվածությունն ու բանակի համալրումը:

 

Գլխավոր նպատակներն են պրոֆեսիոնալ բանակի ձևավորումը, պահեստազորի նպատակային պատրաստումը, տարածքային պաշտպանության համակարգի զարգացումը և բանակի լիարժեք ապահովումը։

«Մոբիլիզացիոն ռեսուրսների բաշխում» նշանակում է մարդկային և տեխնիկական միջոցների նպատակային օգտագործում պատերազմի կամ արտակարգ իրավիճակների ժամանակ՝ միաժամանակ ապահովելով թե՛ բանակի, թե՛ երկրի տնտեսության անխափան գործունեությունը։

 

Մարդկային ռեսուրսների համար գործում է «կցագրում–ամրագրում» համակարգը. պահեստազորում հաշվառված զինծառայողները կցագրվում են համապատասխան զորամասերին ըստ իրենց ԶՀՄ֊ի (ВУС), այսինքն՝ ըստ մասնագիտական ունակությունների: Որոշ մասնագետներ, որոնք կատարում են ռազմավարական կարևոր դեր երկրում, չեն զորակոչվում՝ որպեսզի տնտեսությունը չխափանվի։

Բաշխվող ռեսուրսները երկու տեսակի են:

 

Մարդկային – սպաներ, ենթասպաներ, սերժանտներ, շարքայիններ, որոնք համալրում են թե՛ զորամասերը, թե՛ ռազմավարական նշանակություն ունեցող օբեկտները։

Տեխնիկական – բեռնատարներ, բենզատարներ, հատուկ տեխնիկա և այլ միջոցներ, որոնք անհրաժեշտության դեպքում օգտագործվում են բանակի կարիքների համար։

Այս գործընթացը համակարգվում է պաշտպանության նախարարության Զինված ուժերի Գլխավոր շտաբի, պետական և տեղական ինքնակառավարման մարմինների կողմից և կարգավորվում է համապատասխան օրենսդրությամբ:

 

Զինկոմիսարիատները կազմակերպում են հաշվառումը և զորակոչը, իսկ Գլխավոր շտաբը՝ անհրաժեշտ ռեսուրսների վերաբաշխումն ու ՄՈԲ ստորաբաժանումների համալրումը։

 

Պահեստազորում հաշվառված զինծառայողները և տեխնիկան նախապես կցագրվում են զորամասերին՝ ապահովելով դրանց համալրումը պատերազմի կամ արտակարգ իրավիճակների ժամանակ: Ձեռնարկություններին տրվում են մոբիլիզացիոն առաջադրանքներ՝ արտադրությունն ու ռեսուրսների ապահովումը կազմակերպելու համար: Անհրաժեշտության դեպքում ստեղծվում են ռազմաուսումնական կենտրոններ՝ պահեստազորայինների մարտական պատրաստվածությունը բարձրացնելու նպատակով։

Այս համակարգը համատեղում է բանակի մարտունակությունն ու երկրի կենսունակությունը՝ ապահովելով անվտանգություն ցանկացած իրավիճակում։

ՀՀ պահեստազորի զինծառայողների նախաձեռնություն

24.03.2026 թ.