«Արտ Լանչ»-ը ՆԳՆ-ի հետ 160 մլն դրամի պայմանագիր է կնքել. «Հրապարակ»

Ներքին գործերի նախարարությունը Ռեդի-Սթեդի ՍՊԸ-ի հետ սննդի մատուցման ծառայության պայմանագիր է կնքել՝ մեկ անձից կատարվող գնման ընթացակարգով։ Այս մասին «Հրապարակ»-ը տեղեկանում է մեկ անձից կատարվող գնումների հարթակից։

Ըստ պայմանագրի ՆԳՆ-ն մատուցված ծառայության դիմաց պետք է վճարի 160 մլն դրամ՝ փուլային տարբերակով։ Մատուցված սնունդից օգտվելու են Արտաքին ծառայության ընդգրկված ՀՀ ՆԳՆ ոստիկանության գվարդիայի ծառայողները՝ ամսական միջին ընդհանուր թվաքանակը՝ նախաճաշ 6000 ծառայող, ճաշ՝ 7000 ծառայող, ընթրիք՝ 8000 ծառայող։

Պայմանագիրը կնքվել է մարտի 18-ին և ուժի մեջ է մինչև ընթացիկ տարվա դեկտեմբերի 29-ը։

Նշենք, որ «Ռեդի-Սթեդի» ՍՊԸ-ն հանրությանը հայտնի է «Արտ Լանչ» ապրանքանիշով: «Արտ Լանչ»-ի հիմնադիրը Բակուր Մելքոնյանն է։

Հավելենք, որ վերջին տարիներին «Արտ Լանչ»-ը ՊՆ-ին ամենախոշոր սննդի մատակարարներից է։

ՀԳ․ ՆԳՆ խոսնակը հայտնում է․

Պարզաբանում․ ՆԳ նախարարությունն իր կարիքների համար ծառայությունները ձեռք է բերում բացառապես օրենքով սահմանված կարգով

ՆԳ նախարարությունն իր կարիքների համար ծառայությունները ձեռք է բերում բացառապես օրենքով սահմանված ընթացակարգերով։

ՆԳՆ ոստիկանության գվարդիայի կարիքների համար հրատապ մեկ անձ գնման ձևով պայմանագիր է կնքվել «Ռեդի-Սթեդի» ՍՊ ընկերության հետ՝ հիմք ընդունելով «Գնումների մասին» օրենքի 23-րդ հոդվածի 1-ին մասի 2-րդ ենթակետը, այն է՝ արտակարգ կամ չնախատեսված այլ իրավիճակի առաջացման հետևանքով ծագել է գնման անհետաձգելի պահանջ և, արտակարգ կամ չնախատեսված այլ իրավիճակից ելնելով, գնման այլ ձևերի կիրառումը ժամկետի առումով անհնար է, պայմանով, որ նման պահանջը հնարավոր չէր օբյեկտիվորեն կանխատեսել։

Գնման ընթացակարգը կազմակերպվել է մեկ անձից, հրատապությունից ելնելով՝ քանի որ նախորդ պայմանագիրը գործել է 2021 թվականից մինչև 2026 թվականի մարտի 10-ը։

ՀՀ ՆԳՆ կողմից դեռևս 2025 թվականի հոկտեմբեր ամսից ձեռնարկվել են գնման գործընթաց իրականացնելու աշխատանքները, սակայն այն ձգձգվել է, քանի որ նոր գնման ընթացկարգ հայտարարելու համար անհրաժեշտ էր ստանալ ՀՀ կառավարության հավանությունը՝ տարածքները մատակարար ընկերությանը ուղիղ ձևով վարձակալությամբ հատկացնելու վերաբերյալ, որի համար անհրաժեշտ էր իրականացնել վարձակալությամբ տրամադրելու շուկայական ամսական արժեքի գնահատման գործընթաց։
Այդ նպատակով ՀՀ ՆԳ նախարարության կողմից կազմակերպվել է աշխատանքային քննարկում ՀՀ ֆինանսների նախարարության և ՀՀ ՏԿԵՆ պետական գույքի կառավարման կոմիտեի ներկայացուցիչների հետ, ինչի արդյունքում Նախարարությունը դիմել է ՀՀ ՏԿԵՆ պետական գույքի կառավարման կոմիտե՝ վերոնշյալ գործընթացն իրականացնելու նպատակով:

Պետական գույքի կառավարման կոմիտեի կողմից գնահատման արդյունքները ՀՀ ՆԳՆ-ին տրամադրելուց հետո վարձավճարի չափերը ներառվել են ՀՀ կառավարության որոշման նախագծում, որը և ուղարկվել է ՀՀ կառավարություն։

Հավելենք նաև, որ պայմանագրի գինը՝ 160,000.0 հազ. ՀՀ դրամը սահմանում է առավելագույն արժեքը, և վճարումները իրականացվում են բացառապես փաստացի մատուցած ծառայությունների դիմաց։ Բացի այդ, պայմանագրով նախատեսվել է, որ մրցակցային ընթացակարգով գնման գործընթացի արդյունքում պայմանագիր կնքելու դեպքում սույն պայմանագրի գործողությունը կդադարի։