«Մուկը» մտել է մկան ծակն ու փորձում է պաշտպանել իր թալանը

Իր խնամու գլխին «բամփող», ժամանակին «գոտիները պինդ կապելու» հրահանգ տվող ու «ստվերի դեմ պայքարող»` ՀՀ նախկին վարչապետ ու ԱԺ նախկին նախագահ Հովիկ Աբրահամյանը «կրավորական» դիրք է ընդունել՝ ո՛չ նախկին է, ո՛չ ներկա։ Նա իր մականունին հատուկ գործելաոճով «մկան ծակն է մտել» ու ո՛չ գվվում է, ո՛չ բվվում։ Դե երևի՝ շառից փորձանքից հեռու...

Այսօր Հովիկ Աբրահամյանի անվան հետ կապված մի քանի քրեական գործեր են քննվում։ Նրա նկատմամբ հարուցված գործերը հիմնականում վերաբերում են․

Ապօրինի հարստացմանը
Պաշտոնեական լիազորությունների չարաշահմանը
Անշարժ գույքի հետ կապված կասկածելի գործարքներին (օրինակ՝ պետական կամ համայնքային հողերի փոխանցում)
Որոշ դեպքերում նաև կաշառքի կամ ազդեցության չարաշահման կասկածներ

Այս գործերից ամենահայտնիներից մեկը կապված էր նրա կողմից ապօրինի ձեռք բերված գույքի և բիզնեսների հետ, որոնք, ըստ քննության, չեն համապատասխանել հայտարարագրված եկամուտներին։

Քննչական մարմինների վարկածով՝ Աբրահամյանը և նրա հետ կապ ունեցող անձինք ձեռք են բերել մեծածավալ գույք և բիզնեսներ, որոնք չեն համապատասխանել նրա պաշտոնական հայտարարագրված եկամուտներին։

Խոսքը վերաբերում է հողատարածքների և անշարժ գույքի ձեռքբերմանը, բիզնես ակտիվների վերահսկմանը (հաճախ միջնորդ անձանց միջոցով) և դրանց հնարավոր օրինականացման սխեմաներին, որպեսզի թաքցվի իրական ծագումը։

Այս գործն առանձնանում է, որովհետև այն վերաբերում է ոչ միայն կոնկրետ դրվագի, այլև երկար տարիների ընթացքում կուտակված կարողությանը, և նախկին բարձրաստիճան պաշտոնյայի կողմից համակարգային չարաշահումների հնարավորությանը։

Ամենաշատ քննարկված դրվագները Հովիկ Աբրահամյանի գործով կապված էին կոնկրետ հողատարածքների, առանձնատների և բիզնեսների հետ, որոնք, ըստ քննության, գույքը փաստացի պատկանել է Աբրահամյանին, բայց ձևակերպված է եղել այլ անձանց անունով՝ իրական սեփականատիրոջը թաքցնելու համար։

Քննչական մարմինների վարկածով, Աբրահամյանի իրական ունեցվածքը շատ ավելի մեծ է եղել, քան հայտարարագրված եկամուտները թույլ կտային։

Նման կոռուպցիոն սխեմաների ժամանակ հիմնականում պաշտոնյաներն իրենց ունեցվածքը գրում են զավակների, կնոջ, հարազատների ու անգամ խնամիների վրա։ Տեղեկություններ կան, որ Հովիկ Աբրահամյանի դեպքում այդ ցուցակն ընդլայնել է իր աշխարհագրական դիրքն ու ընդգրկել նաև շարքային գյուղացիների՝ Աշոտին, Հակոբին, Կարենին, վարորդ Գրիգորին, Գագիկին, Ամբիկին, Արթուրին, Գայանեին, Սուսաննային ․․․ մի խոսքով՝ բոլոր անշառ ծանոթ ու անծանոթներին, ովքեր ակամայից շառի մեջ են ընկել՝ Հովիկ Աբրահամյանի նկատմամբ հարուցված գործերի մեջ ներքաշվելով։

Ակնհայտ է, որ եթե իսկապես այն ամեն ինչը վերագրվում է Աբրահամյանին, իսկապես նրա սեփականությունն է, ապա այդ ամենը նա կուտակել է պետության թալանի միջոցով։ Բայց դատարանում Աբրահամյանը համառորեն հերքում է, թե՝ ի՞նչ թալան, ի՞նչ բան, ես այդ ամենի հետ կապ չունեմ․

«Ես փող չեմ լվացել, պետք ա թալանած լինեմ, որ վերադարձնեմ․ չեն կարող ապացուցել»,- ասում է նա։

Այստեղ են ասել՝ բա Մոնումենտի պալատդ ու մյուս առանձնատներդ, կամ հողատարածքներդ ու ՍՊԸ-ներդ հորդ փողերո՞վ էիր գնել․․․

Ինչևէ, այսօր Աբրահամյանը զգույշ է, շատ զգույշ։ Այնքան զգույշ, որ չի միանում իր նախկին կուսակից ընկերներին ու չի պահանջում Նիկոլ Փաշինյանի հրաժարականը, դավաճանի, կապիտուլյանտի ու հողատուի պիտակներ չի փորձում կպցնել նրան։ Թեև հոխորտում է, թե վախեր չունի, բայց անգամ իր ընտանիքի քավոր Սամվել Կարապետյանի թիմի կողքով չի անցնում՝ «мало ли чего?»։ Մեկ էլ տեսար՝ Փաշինյանը բռնեց-կատաղեց ու վերջանականապես ապացուցեց, որ բոլոր վերոհիշյալ անունների հետևում թաքնված է մի անուն և դա Հովիկ Աբրահամյանն է։

Ու որպեսզի Նազարը չկատաղի՝ «Մուկը» մտել է մկան ծակն ու փորձում է պաշտպանել իր թալանը։

Արմինե Մկրտումյան