«Հրապարակ»․ Դասախոսը պահանջում է իրենց ազատել «բանտարկությունից»
«Հրապարակ» թերթը գրում է․
«Իջևանի պետական քոլեջի երկարամյա դասախոս, գրող, լրագրող Զավեն Ալավերդյանը ֆեյսբուքյան իր էջում բաց նամակ է գրել` ուղղված ՀՀ քաղաքաշինության, տեխնիկական եւ հրդեհային անվտանգության տեսչական մարմնի ղեկավար Գարեգին Խաչատրյանին․ «Հայտնում եմ, որ Տավուշի Պ․ Տէվեճեան տարածաշրջանային քոլեջ-հիմնադրամի տնօրինությունը, ի հեճուկս մի շարք ողջամիտ մարդկանց հորդորներին, դասերի ընթացքում փակում է քոլեջի բոլոր ելքերը՝ շուրջ 350 ուսանողներին եւ 80 աշխատակիցներին թողնելով արտակարգ իրավիճակների վտանգի տակ՝ հրդեհ, երկրաշարժ եւ այլն։ Խնդրում եմ ձեռք առնել համապատասխան միջոցառումներ՝ այս վտանգավոր իրավիճակն ի չիք դարձնելու եւ մեղավոր անձանց պատասխանատվության ենթարկելու համար։ Հարգանոք՝ ՀՀ ժուռնալիստների, Համահայկական եւ ԱՄՆ հայ գրողների միությունների անդամ, դասախոս Զ․ Ա․ Ալավերդյան»։
Նամակի հեղինակ Զավեն Ալավերդյանը մեզ հայտնեց, որ նույն երեւույթն առկա է նաեւ Իջեւանի հանրակրթական դպրոցներում, դրանցում, ինչպես Իջեւանի Պ․ Տէվեճեան տարածաշրջանային քոլեջում, դասերի ժամանակ կրթօջախների դռները փակում են, բացում են միայն դասամիջոցների ժամանակ։ Հավելենք, որ նույնը կատարվում է նաեւ հանրապետության մյուս դպրոցներում, որտեղ պահակները դռները փակում են, բանալին դնում իրենց գրպանը եւ դասերի ժամանակ ոչ մեկին ո՛չ ներս են թողնում, ո՛չ` դուրս: Կալանավայրերին բնորոշ այս դրվածքը նոր բան չէ եւ պայմանավորված է նրանով, որ աշակերտները սիրով չեն հաճախում կրթօջախներ, եւ հաճախելու նպատակն էլ ոչ թե ուսումն է, այլ՝ պարտադրանքը»:
Մանրամասները՝ թերթի այսօրվա համարում
