Քննարկվել են ՀԱՊԿ պատասխանատվության գոտում անվտանգության ապահովման արդիական հարցերը

Աստանա քաղաքում տեղի են ունեցել Հավաքական անվտանգության պայմանագրի կազմակերպություն գլխավոր քարտուղար Թաալաթբեկ Մասադիկովի հանդիպումները Գիզատ Նուրդաուլետովի (Ղազախստանի Անվտանգության խորհրդի քարտուղար), Երմեկ Քոշերբաևի (Ղազախստանի արտաքին գործերի նախարար) և Դաուրեն Կոսանովի (Ղազախստանի պաշտպանության նախարար) հետ։ Հայտնում են կազմակերպության մամուլի ծառայությունից։

Կողմերը մանրամասն քննարկել են ՀԱՊԿ պատասխանատվության գոտում անվտանգության ապահովման հետ կապված արդիական հարցեր։

Թաալաթբեկ Մասադիկովը տեղեկացրել է 2025 թվականի նոյեմբերյան նստաշրջանի ընթացքում ընդունված որոշումների իրականացման միջոցառումների ծրագրի կատարման ընթացքի, ինչպես նաև Ռուսաստանի նախագահության ժամանակահատվածում Կազմակերպության գործունեության առաջնահերթ ուղղությունների մասին՝ ներառյալ առաջիկա կանոնադրական մարմինների նիստերի նախապատրաստումը։

Ղազախստանի Անվտանգության խորհրդի քարտուղար Գիզատ Նուրդաուլետովի հետ զրույցի կենտրոնում եղել է իրավիճակի զարգացումը Աֆղանստանում, ինչպես նաև տաջիկա-աֆղանական սահմանը ամրապնդելու վերաբերյալ ՀԱՊԿ նպատակային միջպետական ծրագրի իրականացման ընթացքը։

Ղազախստանի արտաքին գործերի նախարար Երմեկ Քոշերբաևի հետ հանդիպման ընթացքում ՀԱՊԿ գլխավոր քարտուղարը խոսել է Կազմակերպության միջազգային դիրքերի ամրապնդման մասին՝ մասնավորապես նշելով համագործակցության աճը այնպիսի միջազգային կառույցների հետ, ինչպիսիք են Միավորված ազգերի կազմակերպությունը, Շանհայի համագործակցության կազմակերպությունը, ինչպես նաև հարաբերությունների զարգացման ծրագրերը ԱՍԵԱՆ երկրների և Արաբական պետությունների լիգայի հետ։

Թաալաթբեկ Մասադիկովը Ղազախստանի պաշտպանության նախարար Դաուրեն Կոսանովին տեղեկացրել է ՀԱՊԿ 2026 թվականի առաջնահերթությունների ռազմական բաղադրիչի իրականացման մասին, այդ թվում՝ անդամ պետությունների բազային ռազմական ուսումնական հաստատություններում կադրերի համատեղ պատրաստման կազմակերպման վերաբերյալ։ Հանդիպման մասնակիցները քննարկել են նաև ընթացիկ տարվա երկրորդ կեսին նախատեսված խոշորածավալ համատեղ զորավարժությունների շարքի նախապատրաստումը, այդ թվում՝ «Ռուբեժ-2026» զորավարժությունը, որը կանցկացվի Ղազախստանի Հանրապետությունում։