«Հրապարակ»․ ՔՊ-ում սպասում են Փաշինյանի խոսքին

«Հրապարակ» թերթը գրում է.

«Նախընտրական քարոզարշավի պաշտոնական մեկնարկը դեռ չի տրվել, սակայն Փաշինյանն իր թիմով օգտագործելով պետական միջոցները՝ ամեն շաբաթ մեծ շքախմբով, անվտանգության աշխատողների ու ոստիկանների ուղեկցությամբ շարունակում է մարզեր այցելել։ Շաբաթ-կիրակի էլ նրանց ուրախ, բայց արդեն մահաբեր ավտոբուսը կամ, ինչպես ժողովուրդն է կնքել` «շառասյունը» մեկնում է քարոզարշավի: Այս կիրակի Փաշինյանի մարզային այցի ժամանակ Լոռի շտապելիս ոստիկանության մեքենան բախվել էր մեկ այլ մեքենայի, որի արդյունքում մեկ մարդկային կյանք խլվեց, 12 վիրավոր տեղափոխվեց հիվանդանոց:

Բայց դա չխանգարեց, որ Փաշինյանի թափառախումբն այցելի Լոռի, Տավուշ, Արագածոտն։ Այս անգամ «ուրախ ավտոբուսի» «պասաժիրները» ոչ թե նախընտրական ցուցակի առաջին 50-յակից էին, այլ՝ ավելի հետին հորիզոնականներից, դիցուք՝ Անդրանիկ Քոչարյանը, Փարաքարի նախկին համայնքապետը` աղմկահարույց պատմությունների կիզակետում մշտապես հայտնված Լյուդվիգ Գյուլնազարյանը, ոչ պակաս աղմկահարույց պատմությունների մեջ հայտնված Կոջոյան կրթահամալիրի տնօրեն Ռուզան Տոնոյանը եւ այլք։ Այս բոլորին հատ-հատ նկարահանում էին, ստիպում, որ սրտիկ ցուցադրեն: Որքան նկատեցինք, միայն Անդրանիկ Քոչարյանը ձեռքերի այդ ծամածռությունը չարեց:

Որոշ տեղեկություններով, թիմում որոշում ունեն՝ ամեն շաբաթ-կիրակի ավտոբուսի կազմը փոխել եւ մինչեւ հարյուրերորդ հորիզոնականում ընդգրկված թեկնածուներին հանել մարդամեջ` տանել քարոզարշավի, թիմին լիարժեք ներգրավել նախընտրական պայքարի մեջ, այդպիսով միայն հնարավոր բոլորին մասնակից դարձնել նախընտրական պայքարին: Բանն այն է, որ տեւական ժամանակ է՝ առաջին հիսունյակն առանձնացել է մնացած կազմից, մյուսներն իրենց լքված ու արհամարհված են զգում, եւ պարտվողական տրամադրություններ կան, որ գուցե իրենց իշխանությունը չի վերընտրվելու, եւ այդ պատճառով են 50 ընտրյալներով միայն պտտվում, իսկ մնացածը Նիկոլ Փաշինյանին տեսնում են միայն Ազգային ժողովում կառավարության հետ հարցուպատասխանի օրերին եւ անորոշության մեջ են, չեն հավատում հաղթանակին, տառապում են, թե ամեն մեկը որտեղ է լինելու հունիսի 7-ից հետո, ինչ ճակատագիր է իրենց սպասվում։ Չնայած Նիկոլ Փաշինյանը վարչության անդամներին հանձնարարել է աշխատանքներ տանել նախընտրական ցուցակի հետնամասում հայտնվածների, այն է՝ 100-րդից ներքեւ գտնվող թեկնածուների հետ եւ ասել, որ միայն իրենց ակտիվ աշխատանքի դեպքում է հնարավոր լինելու հաղթանակը, եւ որ ինքը բոլորի աշխատանքը տեսնելու է ու գնահատելու է հավուր պատշաճի, նաեւ հաղթանակի հույս ներշնչել: Այդուհանդերձ, ՔՊ-ականները, մի կողմ քաշված, սպասում են անձամբ Փաշինյանի հետ հանդիպումներին։

Ի դեպ, այս շաբաթ Փաշինյանը եւ իր կաբինետը հնարավոր է մի քանի օր անցկացնեն խորհրդարանում։ Չորեքշաբթի օրվանից խորհրդարանում մեկնարկելու է կառավարության 2021-2025 թվականների ծրագրի նախորդ տարվա հաշվետվությունը, եւ Փաշինյանն այն ուզում է նախընտրական քարոզչության վերածել։ Մեզ ասացին, որ շարքային ՔՊ-ականներից շատերը ոգեւորված են, վերջապես կկարողանան ուղիղ շփվել Փաշինյանի հետ եւ թեկուզ նրա ակնարկներից հասկանալ, թե ինչ է սպասվում։ Ավելին, մեր աղբյուրները կատակեցին, որ ոմանք հուժկու ելույթներ են պատրաստում, որ Փաշինյանին իրենց հավատարմությունը ցույց տան ու ամրագրեն իրենց ապագա կարգավիճակը` իշխանության վերարտադրության դեպքում: Խորհրդարանից դուրս մնացողներն իրենց տեսնում են գործադիրում՝ փոխնախարարի, վարչության պետի կամ որեւէ ՊՈԱԿ-ի ղեկավարի պաշտոնում։

Ի դեպ, արդեն տեղեկություններ ենք ստանում, որ, ի տարբերություն էլիտար ՔՊ-ականների, շարքային ՔՊ-ականներն ակտիվ տասովկաների մեջ են, խոսքը տարածքային խորհուրդների ներկայացուցիչների մասին է: Երեւանի վարչական շրջաններում սկսել են «գույքագրել» յուրայիններին` ցուցակագրում են մարդկանց անձնագրերով եւ տեղեկացնում, որ ընտրությունների շեմին իրենց հետ կապ կհաստատեն: Հին ՀՀԿ-ական մեթոդները նորից սկսել են աշխատել, չի բացառվում, որ ընտրակաշառքի թեմա էլ լինի»:

Մանրամասները` թերթի այսօրվա համարում