«Փաստ». Քպականներն ընդդեմ իրենց ղեկավարի

«Փաստ» թերթը գրում է.

«Վերջին շրջանում գնալով ավելի ու ավելի հաճախ է այնպիսի տպավորություն ստացվում, որ քպականներն անընդհատ, ինչպես ասում են, «կրակում են իրենց ոտքին»: Մինչ Նիկոլ Փաշինյանը հնարավոր ու անհնար, թույլատրելի ու անթույլատրելի, օրինական ու անօրինական բոլոր միջոցները կիրառում է հատակին հայտնված վարկանիշը մի քիչ գոնե փրկելու համար, մի շարք քպականներ պարբերաբար պարզապես ջուրն են գցում այդ ջանքերը:

Օրինակ՝ մեկը սոցցանցերում փողոցային մակարդակով ամենավերջին խոսքերով հայհոյում է քաղաքացիներին, մյուսը խոսում է «կրծքերի զբաղվածության» մասին, երրորդը վիրավորում է բանակում բոլոր ծառայողներին և այլն, և այլն: Ընդ որում, մի տեսակ քպական սովորություն են դարձրել՝ անել ինչ-որ խայտառակություն, հետո մի կեսբերան ներողություն խնդրել, կարծես դրանով իրենց արածը դարձավ ընդունելի:

Հասկանալի է, իհարկե, որ այդ ամենը բնորոշ է քպականներին, նրանք երբեք էլ քաղաքակիրթ խոսքով աչքի չեն ընկել: Նիկոլ Փաշինյանն ինքն էլ այս առումով ևս անընդհատ հատում է բոլոր «կարմիր գծերը», ի մասնավորի՝ օրերս ընդդիմությանը ձայն տալու պատրաստ բոլոր քաղաքացիներին, այսինքն՝ հայ մարդկանց գերակշիռ մեծամասնությանն անվանել էր «շուն ու շանգյալ»: Սակայն վերջին շրջանում առանձին քպականների պահվածքը, որոնք մրցակցության մեջ են, թե ով ավելի մեծ հավատարմություն կցուցաբերի Նիկոլ Փաշինյանին, ով ավելի թունդ կվիրավորի ընդդիմադիրներին, դուրս է գալիս նույնիսկ ՔՊ-ին բնորոշ խոսույթի շրջանակներից:

Մեր ունեցած տեղեկություններով, նույնիսկ Նիկոլ Փաշինյանն է զարմացել նման դրսևորումներից և հանձնարարել է ոչ միայն սահմանափակել հրապարակային խոսքի շրջանակը, այլ նաև խստորեն վերահսկել քպականների պահվածքը սոցցանցերում: Ըստ երևույթին, ինքն էլ է հասկանում, որ բազմաթիվ քպականներ իրենց պահվածքով փաստացի իր դեմ են աշխատում: Երևի ակամա:

Առավել մանրամասն թերթի այսօրվա համարում