Մայիսի 20-ից հետո իշխանությունները կարող են սկսել ՀԷՑ-ի ազգայնացման գործընթացը

«Հայաստանի էլեկտրական ցանցեր» ՓԲԸ-ի բաժնետոմսերի փոխանցման գործարքը պետք է ավարտվի մինչև մայիսի 20-ը։ Հակառակ դեպքում պետությունը կսկսի ընկերությունը գերակա հանրային շահի օբյեկտ ճանաչելու գործընթացը։ Այս մասին ապրիլի 22-ին լրագրողների հետ զրույցում հայտարարել է ՀԷՑ-ի ժամանակավոր կառավարիչ Ռոմանոս Պետրոսյանը։

Նրա խոսքով՝ ներկայումս գործում է Վարչական դատարանի որոշումը, համաձայն որի՝ Կառավարության լիազոր մարմնին՝ Տարածքային կառավարման և ենթակառուցվածքների նախարարությանը, հրահանգված է մինչև մայիսի 25-ը ձեռնպահ մնալ ազգայնացման գործընթացի մեկնարկից։ Սա կողմերին հնարավորություն է տալիս բանակցությունների միջոցով հասնել փոխհամաձայնության։ «Այս փուլում փորձ է արվում բանակցությունների միջոցով ապահովել, որպեսզի ընկերության 100% բաժնետոմսերը անցնեն պետությանը՝ փոխադարձ համաձայնությամբ։ Սակայն եթե այդ ժամկետում արդյունք չլինի, գործընթացը կմտնի պարտադիր պետականացման փուլ։ Պետականացման հաջորդ փուլում նախատեսվում է անկախ լիցենզավորված կազմակերպության կողմից ընկերության շուկայական արժեքի գնահատում, որին կավելացվի օրենքով սահմանված 15 տոկոս փոխհատուցումը», - պարզաբանել է Պետրոսյանը։

Իմ կարգավիճակը ենթադրում է ՀԷՑ-ի պետականացման գործընթացի ամբողջական ավարտ պաշտոնավարում: Այդ շրջափուլը դեռևս մի քանի ամիս կտևի: Եթե մինչև մայիսի 25-ը բաժնետոմսերի փոխանցման վերաբերյալ գործարք տեղի չունենա՝ կմտնենք նոր հանգրվան, որը ենթադրում է Կառավարության որոշմամբ ՀԷՑ-ին ճանաչվել հանրային գերակա շահ

Պաշտոնյայի նշմամբ՝ գնահատման գործընթացի ավարտից հետո բաժնետոմսերը կանցնեն պետության սեփականությանը, ինչից հետո լիազոր մարմինը կդիմի Հանրային ծառայությունները կարգավորող հանձնաժողով՝ էլեկտրական էներգիայի բաշխման գործունեության նոր լիցենզիա ստանալու նպատակով։

Ռոմանոս Պետրոսյանը նաև հայտնել է, որ իր լիազորությունները կդադարեցվեն ընկերության կողմից նոր լիցենզիա ստանալուց և գործընթացի ամբողջական ավարտից հետո։