Արայիկ Հարությունյանը փորձում է ՔՊ-ականների մոտ խեղդել պարտության կասկածի որդը. «Հրապարակ»

«Հրապարակ» թերթը գրում է.

«Հունիսի 7-ին սահմանադրական մեծամասնություն վերցնելու մասին իշխանության բարձրաստիճան պաշտոնյաների մեծախոս հայտարարությունների հետևում, պարզվում է՝ թաքնված է իրենց շանսերի վրա խիստ կասկածող և պարտություն կանխատեսող շարքային կուսակցականների մի մեծ բազմություն։ Մասնավորապես, հատկապես կասկածներ ունեն ՔՊ նախընտրական շտաբի պետերը, որոնք հիմնական ձայն բերողներն են համարվում։

Ըստ մեր իշխանական աղբյուրի, շտաբի պետերն ընդհանուր «չաթ» ունեն և գրեթե ամենօրյա ռեժիմով այստեղ քննարկում են իրենց խնդիրները, կիսվում են իրենց կասկած-մտահոգություններով։

Չաթում է նաև ՔՊ նախընտրական շտաբի պետ, վարչապետի աշխատակազմի ղեկավար Արայիկ Հարությունյանը, որը փորձում է խեղդել կասկածի որդը և հավատ ու ոգևորություն փոխանցել շտաբի շարքային պետերին։

Օրերս նա մի բոցաշունչ տեքստ է գրել չաթում՝ փորձելով փարատել թիմակիցների կասկածները, վստահեցրել է, որ իրենց շանսերը շատ մեծ են, կասկած թող չունենան հաղթանակի հարցում։ Սակայն մարզային և տեղական շտաբի պետերը դրանից չեն մխիթարվել, քանի որ գետնի վրա են կանգնած և առանձին զրույցներում սկսել են դժգոհել, թե վերևներում իրականությունից կտրված են և ամեն ինչ անում են, որ վիճակն ավելի վատանա՝ «իշխանությունն ինքն իր դեմ քայլեր է անում․ մե՛կ նոր անձնագրերի թեման, մե՛կ ադրբեջանցիների այցելությունը, իրենք մեզ խանգարում են, հետո մեզնից են արդյունք պահանջելու»»։

Մանրամասները թերթի այսօրվա համարում