Մարզպետը, երազներն ու Գնդոյի քաղաքական ֆենոմենը

Արագածոտնում արդեն գարունը ոչ թե ծաղիկներով է գալիս, այլ քաղաքական հաշվարկներով։ Ասում են՝ մարզպետ Սերգեյ Մովսիսյանը վերջին շրջանում այնքան է խորացել ընտրությունների մաթեմատիկայի մեջ, որ գիշերը նույնիսկ ոչխար չի հաշվում, հաշվում է՝ «էս գյուղում քանի ձեն, էն գյուղում ով ում վրա նեղացած»։

Մարզպետի աշխատակազմում լեգենդներ են պտտվում, թե մարդը մի օր քարտեզի վրա Ապարանը նայելիս հանկարծ կանգնել է, խորը հոգոց հանել ու ասել․

«Միակ հույսը Գնդոն ա…»

Դրանից հետո, ասում են, մարզպետի կաբինետում ամեն ինչ փոխվել է։ Սուրճի բաժակների տակ ընտրական սխեմաներ են, պատերին՝ համայնքային տոկոսներ, իսկ աշխատակիցներին արդեն չեն հարցնում «բարի լույս», այլ՝

- «ՔՊ-ի վարկանիշը քանի՞ տոկոս ա ձեր թաղում»։

Ապարանի քաղաքապետ Գնդոն մինչդեռ դարձել է մարզային քաղաքականության «վերջին բաստիոնը»։

Մարդը արդեն էն աստիճանի կարևոր ֆիգուր է համարվում, որ եթե մի օր պարզապես փռշտա, Աշտարակում շտապ նիստ են անում՝ հասկանալու՝ «էս փռշտոցը քաղաքական մեսի՞ջ էր, թե՞ սովորական մրսածություն»։

Ասում են՝ նույնիսկ խորհրդարանական ընտրությունների թեմայով մարզպետը գիշերը վատ երազ է տեսել։ Երազում ընդդիմությունը մեծ հանրահավաք էր անում, իսկ ինքը մենակ կանգնած էր ընտրական քարտեզի առաջ ու աղոթում էր․

- «Գոնե Գնդոն առողջ լինի… մնացածը կմտածենք»։

Իսկ Աշտարակի քաղաքապետի մասին շրջանառվող պատմությունները արդեն հեռուստասերիալի սցենար հիշեցնող մակարդակի են հասել։

Ըստ մարզային քաղաքական ֆոլկլորի՝ պայմանավորվածություն կա՝ «եթե հին քրեական պատմությունները ջրվեն, մարդը նոր եռանդով կաշխատի կուսակցության համար»։ Թե դա իրականություն է, թե հերթական սրճարանային դավադրապաշտություն՝ ոչ ոք չգիտի, բայց Արագածոտնում լուրերը համացանցից արագ են տարածվում։

Մինչ այդ Դաշնակցական գյուղերում մթնոլորտը լարված է։ Պատմում են՝ մարզպետին այնքան էլ ջերմ չեն ընդունում, հատկապես Փարպիի կողմերում, հենց իր ծննդավայրում։ Մի պապիկ նույնիսկ ասել է․

- «Էս քաղաքականությունից հետո խաղողն էլ ա կուսակցական դարձել»։

Բայց մարզպետը չի հանձնվում։ Քաղաքական փորձագետների կարծիքով՝ նա հիմա ապրում է երեք բառով՝

«Հաշվարկ, Գնդո, ընտրություն»։

Ու եթե մի օր Արագածոտնի երկնքում հանկարծ մեծ գրությամբ երևա «ՔՊ», ոչ ոք չի զարմանա։ Կասեն՝ մարզպետը հերթական ընտրական փորձարկումն էր անում։

Քրիստինե Ավագյան