Քարոզարշավի մեկնարկից առաջ հանդիպել են Փաշինյանն ու Խաչատուրյանը

Տեղի է ունեցել Նիկոլ Փաշինյանի հանդիպումը Հանրապետության նախագահ Վահագն Խաչատուրյանի հետ։

Դա ամենակարևոր բանն է, որպեսզի նաև ընտրությունների արդյունքներն արտահայտեն ժողովրդի կամքը, և իհարկե, նաև ընտրությունների և ժողովրդի կամքի վրա ապօրինի ազդեցության դեմ պայքար պետք է տեղի ունենա, որը մեր պետական ինստիտուտների գործառույթն է։ Իհարկե, մենք վերջին տարիներին ամեն ինչ արել ենք, որ Հայաստանի Հանրապետությունում կարողությունները զարգանան, որպեսզի նաև այդ առումով արդյունավետ պայքար հնարավոր լինի մղել։ Ես համոզված եմ, որ մեր ինստիտուտները կկարողանան այդ գործառույթն իրականացնել, որպեսզի ամեն ինչ մնա բացառապես քաղաքական գաղափարների և ասելիքի մրցակցության դաշտում։

Եվ, իհարկե, նաև ուզում եմ Ձեզ նորից շնորհակալություն հայտնել այս ընթացքում բարեփոխումների ընթացքին աջակցություն ցուցաբերելու համար։ Կարծում եմ, որ բարեփոխումների ընթացքի և արդյունքների մասին հանրության գնահատականի հերթն է, և հանրությունը պետք է իր քվեարկությամբ գնահատական տա: Եվ մենք այս ընթացքում ամեն ինչ կանենք, որպեսզի մեր ժողովուրդը որոշումներ կայացնելու համար իրեն անհրաժեշտ հնարավորինս ամբողջական տեղեկատվություն ստանա, չնայած մինչև այս էլ այդ ուղղությամբ առավելագույն ենք արել»,– նշել է վարչապետ Փաշինյանը։

Նախագահ Խաչատուրյանը շնորհակալություն է հայտնել տեղեկատվության համար և հավելել․ «Իհարկե, անհանգստություն բոլոր դեպքում կա, Կառավարության ղեկավարը և Կառավարության անդամների մի մասն արձակուրդ են գնում նախընտրական քարոզչության մասնակցելու համար, բայց դա մեր օրենքն է: Ես նոր Լատվիայի նախագահի հետ էի հանդիպում, նրան ներկայացրեցի, որ մեր օրենքով այդպես է նախատեսվում, մի փոքր զարմացավ, բայց մեր օրենքն է այդպես նախատեսում և Դուք առաջնորդվում եք օրենքով։

Իրականում ես վստահ եմ, որ Ձեր կողմից, Կառավարության կողմից, իշխանության կողմից ամեն ինչ արվել է, որպեսզի ընտրություններն անցնեն թափանցիկ, առանց որևէ խնդիրների և ընտրության արդյունքները կասկած չհարուցեն, որովհետև այս տարիների ընթացքում մեզ համար ամենամեծ փորձությունը միշտ եղել է ընտրությունը և վատ իրադարձությունները տեղի են ունեցել հենց ընտրությունների և հետընտրությունների ընթացքում։

2018 թվականից հետո բոլոր ընտրություններին կասկած չի եղել, բայց առանձնահատուկ ուզում եմ 2021 թվականը նշել, որովհետև արտահերթ էր, և Դուք այդ քայլն արեցիք, որպեսզի ժողովրդի վստահությունը ստանաք, և ժողովուրդը վստահեց Ձեզ։ Այս 5 տարիների ընթացքում ահռելի աշխատանք է կատարել Կառավարությունը, և այն հաջողությունները, որոնք կան, որոնք արձանագրված են զուտ նաև տնտեսական թվերով, ապացույցն են նրա, որ այդ բարեփոխումները ճիշտ ուղղությամբ են գնացել։

Մի հանգամանք կար, ես ուզում էի գիտական հոդված գրել, դրա ընթացքում եմ, բայց չի ստացվում, որ ավարտեմ։ Մի կարևոր փոփոխություն է տեղի ունեցել, պիտի խնդրեմ, որ Դուք էլ դրան առանձնահատուկ ուշադրություն դարձնեք ու ասեք՝ միգուցե ներկայացնեն։ Մեր պետության մեջ տեղի է ունեցել հանրային արդյունքի բաշխման փոփոխություն։ Եթե ժամանակին այդ հանրային արդյունքը ստեղծողների թիվը շատ փոքր էր, օրինակ՝ 40 մեծահարուստներ, հիմա այդ թիվն անգամներով, զրոներով ավելացել է, և դրա արդյունքում է, որ մարդիկ սկսել են և՛ լավ ապրել, և՛ գործարարությամբ զբաղվել, և՛ տնտեսության մեջ հաջողություն կա։ Դրա արդյունքում է, որ մեր երկրում անհավասարությունը պակասել է։

Ես սկսեցի խորանալ՝ պատճառն ի՞նչն է, շատ պրիմիտիվ է բացատրությունը, որովհետև օրենքներ են աշխատում, օրենքները հասանելի են: Բառ ենք մենք օգտագործում՝ ներառական, մեր տնտեսական քաղաքականության և ընդհանրապես երկրում վարվող քաղաքականության ներառականության մակարդակն է բարձրացել և հասանելի դարձել։ Երբ մեր ծրագրերն եմ նայում, այն ծրագրերը, որ Կառավարությունն է ներկայացնում, դրանց մեջ այդ գործոնը շատ կարևոր է, և դրանով է պայմանավորված նաև ժողովրդի վերաբերմունքը։

Մոտավորապես 50 հազար բնակարան է կառուցվում՝ վերջին երկու տարում 1 մլն քառակուսի մետրից ավելի։ Խորհրդային Միությունում, երբ կառուցում էին 700-800 հազար քմ, դա համարվում էր մեծ հաջողություն։ 1 մլն-ից ավելի և դրան մասնակցում է ոչ միայն պետությունը, այլ մարդիկ՝ պետության օգնությամբ, իսկ Խորհրդային Միությունում պետությունն էր կառուցում։

Եվ երբ խոսում էինք հիպոթեքային վարկերի, 16 միլիոնի ծրագրերի մասին, եկեք սա ներկայացնենք, մարդիկ իրենց առօրյա կյանքում դա տեսնում են, այդ հնարավորությունն են տեսնում։ Եվ ես վստահություն ունեմ, որ հետագայում էլ պետության քաղաքականությունը պետք կլինի նրանում, որ իր քաղաքացին իր երկրին, իր իշխանությանը վստահի, իր պետությանը հավատա։

Եվ այն, ինչ Դուք, Ձեր Կառավարությունն իրականացնում եք որպես քաղաքականություն, հենց դրան է միտված, որ մենք կարողանանք մեր պետությունը հարգել։ Ես նորից եմ կրկնում, չեմ կասկածում, որ իշխանությունն ամեն ինչ անելու է, որպեսզի ընտրություններն անցնեն անխոցելի, բարձր մակարդակով, վստահելի: Բայց ես նաև ցանկանում եմ, որ ընտրության մասնակից կողմերը նույն կերպ վերաբերվեն, և նաև բոլորս հասկանանք՝ Հայաստանի Հանրապետությունում օրենքը կա և ոչ ոք օրենքից դուրս չէ, և ընտրական, և ոչ ընտրական պրոցեսներում, եթե խախտումներ են տեղի ունենում, դրանք պետք է պատժվեն։

Միայն այս դեպքում է, որ մենք հաջողություն կունենանք, սա մեր անձնական հարաբերությունները չեն, սա պետություն է, և պետության մեջ պետք է գործի օրենքը, Սահմանադրությունը։ Հիմա հերթական հինգ տարվա ապագային միտված ծրագրերի ներկայացման հնարավորություն է, թող ներկայացնեն, ժողովուրդը գնահատի և այդ դեպքում ոչ մի կասկած էլ չի հարուցվի, որ ինչ-որ մի տեղ մեկը սխալ է արել, մեկը չարաշահել է կամ չի չարաշահել։

Ես, իհարկե, ինչպես նաև Դուք, անհանգստություն ունենք, որ կփորձեն իհարկե դա անել, բայց մեր պետական ինստիտուտների կայացվածության մակարդակը, եթե 2021 թվականի հետ համեմատենք ու հիմա, անհամեմատ որակյալ են դարձել, անհամեմատ տիրապետում են իրավիճակին։ Դա մեր առօրյա աչքով էլ ենք տեսնում, իհարկե, դեռևս շատ բաներ ունենք անելու, այդ բարեփոխում հասկացողությունն անընդհատ է, մեր կյանքում ամեն օր է, եթե մենք ամեն օր չսովորենք, չբարեփոխվենք, մի օր էլ պարզվելու է, որ մնացել ենք նույնը, ոչինչ էլ չենք փոխել։

Ես հաջողություն եմ մաղթում Ձեզ՝ որպես Կառավարության, պետության ղեկավարի՝ ընտրությունները հաջող կազմակերպելու համար, նաև Ձեզ՝ որպես քաղաքական թիմի ղեկավար ընտրական պրոցեսներում։ Նաև հաջողություններ եմ մաղթում բոլոր այն կուսակցություններին, որոնք իրականում օրենքի շրջանակներում կշարժվեն: Եվ այդ հաջողությունները մաղթում եմ այն պատճառով, որ ես վստահ եմ՝ Հայաստանի Հանրապետությունում ժողովրդավարությունը հաղթելու է, և սա կլինի մեր ժողովրդավարության հաղթանակը»։