Արա՛մ Սարգսյան, էս էլ հո՞ չեք ասելու՝ Պուտինն է եկել, գիշերով գողացել բետոնե հիմքը. Արթուր Չախոյանը նոր տեսանյութ է հրապարակել

«Հիմնավորում եմ, որ Արամ Զավենի Սարգսյանի կուսակից թաղապետ Մարատ Սևոյանն այս ամենի հետ անմիջական կապ ունի»,- ֆեյսբուքյան տեսանյութում ասաց հանրային գործիչ Արթուր Չախոյանը։

 Նախորդ օրը Չախոյանը տեսանյութ էր հրապարակել, որում նշել էր, որ 30 տարվա թալանը քննադատելով ընտրարշավ անցկացնող Արամ Սարգսյանի կուսակից՝ Նոր Նորք վարչական շրջանի ղեկավար Սևոյանը կոռուպցիոն «բեզպրեդելի» մեջ է և ցույց էր տվել նոր բարեկարգված տարածք, որտեղ բետոնի մեջ գրեթե ցեմենտ չէր օգտագործվել և կոպտորեն խախտվել էր նախագծային չափանիշները։

Հանրային գործչի հրապարակումից հետո «Հանրապետություն» կուսակցության ակտիվիստները գրառումներով արդարացել էին, թե իրենց թաղապետը դրա հետ կապ չունի։

Արթուր Չախոյանը հակադարձեց, ցույց տալով նույն շինհրապարակ այցելած Սևոյանի տարածած հաղորդագրությունները և տեսանյութը։

Վարչական շրջանի տարածած այցի վերաբերյալ տեսանյութից երևում է, թե ինչպես են շինարարները բահով բետոնի շաղախ խառնում, որը չի կարող համապատասխանել նախագծով սահմանված B20 դասի բետոնի չափանիշներին։

«Ինչ է նշանակում Թաղապետը տեղակ չի եղել, պատասխանատու չէ, երբ իր աչքի առաջ են թքել-կպցնելով այս գործն արել»,-ասաց Չախոյանը՝ շարունակելով. «Պարզ է չէ, բոլորս էլ հասկանում ենք, թե ինչի դիմաց են աչք փակել»։

 Նա ցույց տվեց, որ իր նախորդ հրապարակման հաջորդ օրն արդեն շինարարները քանդել են եզրաքարերի կողքի անորակ բետոնը՝ նորը լցնելու համար, բայց նախագծով նաև նախատեսվում է, որ եզրաքարերի տակ նույնպես պետք է լինի 10 սմ հաստության B 20 դասի բետոն, որն իսպառ բացակայում է, եզրաքարերը շարած են միանգամից հողի վրա։

«Արա՛մ Սարգսյան, էս եթե կոռուպցիա չէ, աբ ինչ է, էս էլ հո չեք ասելու՝ Պուտինն է եկել գիշերով գողացել բետոնի հիմքը»,-հայտարարեց Արթուր Չախոյանը։