«ԶՊՄԿ-ն ՀՀ տնտեսության շարժիչ ուժն է». կոմբինատից հորդորում են զերծ մնալ քաղաքական նպատակներով ընկերության անունը շահարկելուց
ԶՊՄԿ-ն որևէ քաղաքական ներգրավվածություն և ֆինանսական մասնակցություն չունի, հայտարարել է ԶՊՄԿ լրատվության և հասարակայնության կապերի բաժնի պետ Արայիկ Մարգարյանը` արձագանքելով մամուլի հրապարակումներին։
Նա նշել է, որ ԶՊՄԿ-ն միայն 2021 թ.-ից է 4 տարի անընդմեջ գլխավորել խոշոր հարկատուների ցուցակը, ինչն աննախադեպ ցուցանիշ է եղել ԶՊՄԿ-ի համար։ Դրանից առաջ՝ 10 տարիների ընթացքում, ընկերությունը միայն մեկ անգամ է զբաղեցրել 1-ին տեղը, իսկ 2016 թվականին 1000 խոշոր հարկատուների ցուցակում հանգրվանել էր 16-րդ հորիզոնականում։
«Սրա հետ մեկտեղ, հիշեցնեմ, որ հարկատուների ցուցակում հարկատուների դիրքը կախված է ամենատարբեր հանգամանքներից։ 2025 թվականին ԶՊՄԿ-ն 3-րդ հորիզոնականում է հայտնվել տնտեսության իրական ցուցանիշներին չառնչվող տեխնիկական պատճառներով՝ իրականում շարունակելով առաջինը լինել տնտեսական արդյունքների առումով։ Այս տարի, վստահ ենք, վերադարձնելու ենք նաև առաջատարի ֆորմալ դիրքերը։
Հաջորդ պնդումը վերաբերում էր համաշխարհային շուկայում ԶՊՄԿ-ի դերին, որը կրկին հիմնված է ոչ պրոֆեսիոնալ և շփոթեցնող պնդումների վրա։ Այսպես, հոդվածագիրը պնդում է, որ, լինելով աշխարհում մոլիբդենի խոշոր արդյունահանողների առաջին քսանյակում, նախորդ տարի ընկերության մասնաբաժինը մոլիբդենի համաշխարհային արտադրության մեջ կազմել է 2.2 տոկոս։ Տարբեր հաշվարկներով՝ Քաջարանի հանքավայրում է գտնվում մոլիբդենի համաշխարհային պաշարների շուրջ 7 %-ը, սակայն սա խորհրդային տվյալների վրա հիմնված մոտավոր, պայմանական հաշվարկ է։ Բայց խնդիրը նույնիսկ դա չէ։ Պարզ մաթեմատիկայից հասկացող ցանկացած մարդու համար ակնհայտ է, որ գնահատված պաշարները և տարեկան արտադրության տոկոսները՝ համաշխարհային արտադրության ենթատեքստում, տարբեր հասկացություններ են։
ԶՊՄԿ-ն բազմիցս հայտարարել է, որ տնօրենների խորհրդում կառավարության կամ այլ բաժնետերերի ներկայացուցիչները ուղղակի չեն մասնակցում կառավարչական գործունեությանը, և խորհրդում 21,8%-ի բաժնետիրոջ ներկայացուցիչը չի կարող ազդեցություն ունենալ «Հայաստանի մոլիբդենային ներուժի նվազեցման» կամ ավելացման վրա։ Օգտվելով առիթից՝ ուզում եմ նաև արձագանքել որոշ քաղաքական գործիչների կողմից երբեմն հնչող անհիմն հայտարարություններին և ամենայն պատասխանատվությամբ պնդել, որ ԶՊՄԿ-ն որևէ քաղաքական ներգրավվածություն և ֆինանսական մասնակցություն չունի։ Աշխատակիցների անձնական ծախսերն իրենց անձնական իրավասությունն են։
Առանց վարանելու կարող ենք պնդել, որ ԶՊՄԿ-ն Հայաստանում ամենաթափանցիկ աշխատող ընկերությունների առաջնագծում է՝ թե՛ ֆինանսական հոսքերի, թե՛ մյուս ցուցանիշների մասով։
Իրական շահառուների մասին բոլոր տեղեկությունները ներկայացված են՝ օրենքին և ԱՃԹՆ պարտավորությունների շրջանակին համապատասխան։ Իսկ թե ինչու լրագրողը չի կարողանում տեղեկություններ գտնել բաց աղբյուրներից, չեմ կարող մեկնաբանել։ Հեղինակը չի կարողացել անգամ բաց աղբյուրներից ճշտել սեփականատերերից մեկի մասնաբաժնի ծավալը՝ նրան վերագրելով առնվազն 5 անգամ ավելի մեծ մասնաբաժին։
Միաժամանակ, կարծում եմ՝ լրատվական դաշտում մեր բոլոր գործընկերները առնվազն ոչ պրոֆեսիոնալ կհամարեն այն հանգամանքը, որ լրագրողը մեզ ուղղված հարցումն ուղարկել է հոդվածը հրապարակելուց մեկ ժամ անց, և ոչ թե դրանից առաջ, ինչից ակնհայտ է, որ նպատակը, ցավոք, իրականությունն իմանալը չէր։
Ամփոփելով՝ ուզում եմ հիշեցնել, որ ԶՊՄԿ-ն ՀՀ տնտեսության շարժիչ ուժն է, և հորդորում եմ զերծ մնալ քաղաքական նպատակներով ընկերության անունը շահարկելուց։ Ապատեղեկատվության և չստուգված ու կեղծ պնդումների տարածումը կանխելը տնտեսության երկարաժամկետ շահերից է բխում։ Այլապես, չէի արձագանքի նաև այժմ»,- ընդգծել է ԶՊՄԿ լրատվության և հասարակայնության կապերի բաժնի պետը։
