Ֆրանսիան ՄԱԿ-ի ԱԽ բանաձևի նախագիծ է պատրաստել Հորմուզի նեղուցում միջազգային առաքելություն ստեղծելու վերաբերյալ

Ֆրանսիան ՄԱԿ-ի Անվտանգության խորհրդի բանաձևի նախագիծ է պատրաստել Հորմուզի նեղուցում նավագնացության վերականգնման միջազգային առաքելություն ստեղծելու մասին և կարող է ներկայացնել այն համապատասխան պայմանների առկայության դեպքում, հաղորդում է Reuters-ը՝ հղում անելով երկրի արտաքին գործերի նախարարությանը։

Հորմուզի նեղուցի նկատմամբ վերահսկողությունը, որը համաշխարհային էներգակիրների առևտրի կենսական նշանակության զարկերակն է և որի փաստացի փակումը հանգեցրել է նավթի գների կտրուկ աճի, լուրջ խոչընդոտ է ԱՄՆ-ի և Իրանի միջև եռամսյա պատերազմի դադարեցման շուրջ ընթացող բանակցություններում։

Նեղուցի վերաբերյալ ամերիկա-բահրեյնյան բանաձևը քննարկվում է ավելի քան երկու շաբաթ, և քվեարկությունը բազմիցս հետաձգվել է, քանի որ Չինաստանն ու Ռուսաստանը ազդանշաններ են տվել, որ կարող են վետո դնել դրա վրա։

Ըստ երկու եվրոպացի դիվանագետների՝ Վաշինգտոնն ապահովել է գրեթե 140 երկրների աջակցությունը, որոնք հանդես են եկել որպես տեքստի համահեղինակներ՝ հույս ունենալով խուսափել վետոյից։ Ֆրանսիան, որը ևս օժտված է վետոյի իրավունքով, առայժմ հրաժարվում է պաշտպանել ամերիկյան տեքստը։

«Ներկայում ԱՄՆ-ը և Բահրեյնը քննարկում են բանաձևի նախագիծը։ Դա է կազմում ընթացիկ քննարկումների հիմքը։ Քվեարկության ամսաթիվը դեռևս չի հայտարարվել»,- հայտնել է Ֆրանսիայի ԱԳՆ պաշտոնական ներկայացուցիչ Պասկալ Կոնֆավրոն։