SpaceX-ը փորձնական թռիչքի է ուղարկել իր ամենամեծ և ամենահզոր տիեզերանավը

SpaceX ընկերությունը ուրբաթ փորձնական թռիչքի է ուղարկել իր մինչ օրս ամենամեծ և ամենահզոր Starship տիեզերանավի արդիականացված տարբերակը, որը, ինչպես ակնկալում է ՆԱՍԱ-ն, հնարավորություն կտա տիեզերագնացներին վայրէջք կատարել Լուսնի վրա, հայտնել է ABC News-ը։

Նորացված հրթիռը մեկնարկել է Տեխասի հարավային ծայրամասից՝ տեղափոխելով Starlink-ի 20 արբանյակների մակետներ, որոնք պետք է արձակվեն աշխարհի մյուս ծայրում։

Սա հրթիռի 12-րդ փորձնական թռիչքն է, որը Մասկը կառուցում է, որպեսզի մի օր մարդկանց հասցնի Մարս։ Սակայն նախ պետք է իրականացվեն դեպի Լուսին թռիչքը և ՆԱՍԱ-ի Artemis ծրագիրը։

Հին Starship տիեզերանավերից վերջինը օդ է բարձրացել հոկտեմբերին։ SpaceX-ի երրորդ սերնդի Starship տիեզերանավը՝ կատարելագործված V3 տարբերակը, օդ է բարձրացել Starbase բազայի բոլորովին նոր արձակման հարթակից մեքսիկական սահմանի մոտ։ Վերջին պահին վայրէջքի հարթակում առաջացած խնդիրների պատճառով հինգշաբթի երեկոյան մեկնարկի փորձը ձախողվել էր։ SpaceX-ը հույս ուներ խուսափել այն «հրավառությունից», որը տեղի էր ունեցել անցյալ տարվա հաջորդական արձակումների ժամանակ, երբ օդում պայթյունների հետևանքով բեկորներ էին թափվել Ատլանտյան օվկիանոս։ Նախորդ թռիչքները նույնպես ավարտվել էին հրդեհներով։ Այս նորագույն մոդելի բարձրությունը 124 մետր է, ինչն ավելի քան 1 մետրով գերազանցում է Starship-ի հին մոդելները և ապահովում է շարժիչների ավելի մեծ քարշ։

Թարմացված կրող հրթիռը համալրված է ավելի քիչ թվով, սակայն ավելի մեծ և ամուր ճաղավանդակային կայունացնող սարքերով, որոնք մեկնարկից հետո այն վերադարձնում են Երկիր, ինչպես նաև ավելի մեծ և հուսալի վառելիքատար խողովակաշարով՝ 33 հիմնական շարժիչներին վառելիք մատակարարելու համար։

Վառելիքատար խողովակաշարի չափերը համապատասխանում են SpaceX-ի Falcon 9-ի առաջին աստիճանի կրող հրթիռի չափերին։ Ռետրո ոճով, չժանգոտվող պողպատից պատրաստված տիեզերանավը նույնպես հագեցած է անհրաժեշտ ամեն ինչով՝ ավելի շատ տեսախցիկներով, ավելի մեծ նավիգացիոն և հաշվարկային հզորությամբ, ինչպես նաև միացման կոնուսներով՝ ապագա մոտեցումների և Լուսին թռիչքների համար։

Ենթադրվում է, որ Starship-ը կլինի լիովին բազմակի օգտագործման, իսկ արձակման հարթակների վրա տեղադրված հսկայական մեխանիկական լծակները կբռնեն հրթիռի վերադարձող աստիճանները։ Սակայն վերջին փորձնական արձակման ժամանակ ոչինչ վերականգնել չի հաջողվել։ Մեքսիկական ծոցը դարձել է արդիականացված առաջին աստիճանի կրող հրթիռի ուղու, իսկ Հնդկական օվկիանոսը՝ տիեզերանավի և դրա արբանյակների ցուցադրական լուսանկարների վերջնակետը։

ՆԱՍԱ-ն միլիարդավոր դոլարներ է վճարում SpaceX-ին, ինչպես նաև Ջեֆ Բեզոսի Blue Origin-ին, լուսնային սարքեր մատակարարելու համար, որոնք կօգտագործվեն Artemis ծրագրի տիեզերագնացներին Լուսնի վրա իջեցնելու նպատակով։