ՌԴ-ն կասեցրել է «Ջերմուկ» հանքային ջրի 64,5 միլիոն շշի վաճառքը

Ռոսպոտրեբնադզորը հանձնարարել է կասեցնել հայկական «Ջերմուկ» հանքային ջրի 64,5 միլիոն շշի վաճառքը, հայտնել են գերատեսչության մամուլի ծառայությունից։

«Ռոսպոտրեբնադզորը լրացուցիչ հանձնարարական է ուղարկել «Չեստնի զնակ» («Честный знак») պետական մարկավորման համակարգի օպերատորին՝ Ռուսաստանի Դաշնության տարածքում «Ջերմուկ» բնական բուժիչ-սեղանի գազավորված հանքային խմելու ջրի 64,5 միլիոն միավորի իրացումը կասեցնելու վերաբերյալ»,— ասված է հաղորդագրության մեջ։

Այս որոշման հիմք են հանդիսացել արտադրողի կողմից տեխնիկական կանոնակարգման պահանջների խախտումները։ Ջրի մեջ հայտնաբերվել է հիդրոկարբոնատ-իոնի, քլորիդների և սուլֆատների պարունակության գերազանցում։ Սա կարող է մոլորության մեջ գցել սպառողներին՝ ջրի բուժիչ հատկությունների վերաբերյալ, և բացասաբար անդրադառնալ առողջության վրա։

Գերատեսչությունից հավելել են, որ տարեսկզբից «Չեստնի զնակ» համակարգն արդեն արգելափակել է «Ջերմուկ» ջրի 38,4 միլիոն միավորի իրացումը մանրածախ և առցանց վաճառքի կետերում։

Անցյալ շաբաթ Ռոսպոտրեբնադզորը կասեցրել էր այս արտադրանքի ներմուծումը, քանի որ դրա մարկավորման մեջ պարունակվող տեղեկատվությունը չէր համապատասխանում իրականությանը։ Գերատեսչությունն այս որոշման մասին տեղեկացրել է Եվրասիական տնտեսական հանձնաժողովին, ինչպես նաև ԵԱՏՄ անդամ պետությունների լիազոր մարմիններին։