Նավթն էժանացել է ավելի քան 1%-ով
Այսօր նավթի գները նվազել են ավելի քան 1%-ով՝ գրանցելով ապրիլի սկզբից ի վեր ամենամեծ շաբաթական անկումը։ Այս մասին հայտնում է Reuters-ը։ Գների անկման իմնական պատճառը ԱՄՆ-ի և Իրանի միջև հրադադարի երկարաձգման վերաբերյալ լուրերն են, թեև համաձայնագիրը դեռ վերջնականապես հաստատված չէ։
«Brent» տեսակի նավթի գինը նվազել է 1.1%-ով՝ մեկ բարելի համար հասնելով 92.67 դոլարի։ ԱՄՆ «WTI» նավթի գները նվազել են 1.4%-ով՝ հասնելով 87.64 դոլարի մեկ բարելի համար։
Այս շաբաթ «Brent» նավթի գինը ընդհանուր առմամբ նվազել է 10.5%-ով, ինչը ամենամեծ անկումն է ապրիլի 6-ից հետո։ Իսկ «WTI» նավթի գինը նվազել է 9.2%-ով՝ գրանցելով ամենախոշոր շաբաթական անկումը ապրիլի 13-ից ի վեր։
ԱՄՆ-ն և Իրանը հինգշաբթի օրը համաձայնության են եկել երկարաձգել հրադադարը և վերացնել Հորմուզի նեղուցով նավագնացության սահմանափակումները։ Սակայն ԱՄՆ նախագահ Դոնալդ Թրամփը դեռ չի հաստատել համաձայնագիրը, իսկ Իրանի պետական լրատվամիջոցները հայտնել են, որ այն վերջնական տեսքի դեռ չի բերվել։
«IG» ընկերության վերլուծաբան Թոնի Սիկամորի խոսքով՝ հակամարտությունն ավարտվում է, և համաձայնությունը մոտ է։ Նրա կարծիքով, եթե այս իրավիճակը շարունակվի, նավթի գները կարող են էլ ավելի նվազել՝ մոտենալով 80 դոլարի սահմանին։
Վերջին օրերին նավթի շուկան շատ անկայուն է եղել։ Գները կտրուկ տատանվել են ԱՄՆ-Իսրայել և Իրանի միջև երեք ամիս շարունակված հակամարտության հնարավոր ավարտի և Հորմուզի նեղուցի վերաբացման մասին տարբեր տեղեկությունների պատճառով։ Հիշեցնենք, որ Հորմուզի նեղուցը կարևոր ճանապարհ է համաշխարհային նավթի և հեղուկ բնական գազի մատակարարումների համար։
Չնայած որոշ տեղաշարժ կա, նեղուցով բեռնափոխադրումները դեռ չեն վերադարձել պատերազմից առաջ եղած մակարդակին։ «ING» բանկի վերլուծաբանները նշում են, որ նեղուցի վերաբացումը կթեթևացնի իրավիճակը նավթի շուկայում, սակայն լիարժեք վերականգնումը ժամանակ կպահանջի։
Նրանց խոսքով, պատերազմի ընթացքում նավթի արդյունահանումը զգալիորեն նվազել է, իսկ որոշ արտադրողներ դադարեցրել են աշխատանքը պահեստավորման խնդիրների պատճառով։ Բացի այդ, տարածաշրջանի որոշ նավթավերամշակման գործարաններ վնասվել են հարձակումների հետևանքով, հետևաբար արտադրության վերականգնումը արագ չի լինելու։
