«Ռոսսելխոզնադզորը» սահմանափակում է Հայաստանից կորիզավոր մրգերի և խաղողի ներմուծումը

Ռուսաստանի գյուղատնտեսական վերահսկողության դաշնային ծառայությունը («Ռոսսելխոզնադզոր») հունիսի 2-ից սահմանափակում էՀայաստանից կորիզավոր մրգերի և խաղողի ներմուծումը։ Այս մասին հայտնել են գերատեսչության մամուլի ծառայությունից։

Նշվում է, որ գերատեսչությունը բազմիցս հայկական կողմին տեղեկացրել է կարանտինային արտադրանքի մատակարարումների ընթացքում արձանագրված խախտումների մասին, որոնք կապված են ԵԱՏՄ անդամ պետությունների համար կարանտինային օբյեկտների հայտնաբերման հետ։

Ռոսսելխոզնադզորի գնահատմամբ՝ նման դեպքերի աճը վկայում է Հայաստանի գյուղատնտեսության նախարարության լուծարման հետևանքների մասին։ Կառուցվածքային բարեփոխումների արդյունքում այդ լիազորությունները փոխանցվել են Էկոնոմիկայի նախարարությանը։ Գերատեսչությունում կարծում են, որ վերջին շրջանում Հայաստանից մատակարարվող արտադրանքը չի համապատասխանում ԵԱՏՄ-ի և Ռուսաստանի բուսասանիտարական պահանջներին, ինչը կարող է վկայել, որ Հայաստանի էկոնոմիկայի նախարարությունը բախվում է կառուցվածքային խնդիրների և չի կարողանում լիարժեք իրականացնել իր վրա դրված գործառույթները։

Նշվում է, որ ստեղծված իրավիճակը վտանգում է Ռուսաստանի և ԵԱՏՄ տարածքի բուսասանիտարական անվտանգությունը, ինչպես նաև Ռուսաստանում արդյունաբերական այգեգործության, պտղաբուծության և խաղողագործության պետական աջակցության ծրագրերի իրականացումը։

Հաշվի առնելով վերոնշյալը՝ 2026 թվականի հունիսի 2-ից ժամանակավոր սահմանափակումներ են սահմանվում Հայաստանի Հանրապետությունից ծագող և արտահանվող կորիզավոր պտուղների (կեռաս, բալ, ծիրան, սալոր, դեղձ, նեկտարին) և թարմ խաղողի ներմուծման, ինչպես նաև այդ արտադրանքի՝ ԵԱՏՄ անդամ երկրներ տարանցման նկատմամբ՝ մինչև արտահանվող արտադրանքի անվտանգության ապահովման համապատասխան մեխանիզմների մշակումը։