Պուտինն արտահայտվել է Զելենսկու հետ հնարավոր հանդիպման մասին

Ռուսաստանի նախագահ Վլադիմիր Պուտինը հայտարարել է, որ երբեք չի հրաժարվել Վլադիմիր Զելենսկու հետ հանդիպումից, սակայն դեմ է «ջուրծեծոցիին», հաղորդում է ТАСС-ը։

Ռուսաստանի նախագահը Սանկտ Պետերբուրգի միջազգային տնտեսական համաժողովի լիագումար նիստում պատմել է, որ երեք շաբաթ առաջ Ռուսաստանի «գործարար շրջանակների ներկայացուցիչներից մեկը» զանգահարել է իրեն և հայտնել, որ իրեն հրավիրել են Կիև։ Պուտինը հավելել է, որ դրանից հետո նա վերադարձել ու հայտնել է, թե «բացի ամեն տեսակ ջուրծեծոցիից, ամենակարևորն այն է, որ պարոն Զելենսկին հանդիպում է խնդրել»։

«Ես ասում եմ՝ ես երբեք չեմ հրաժարվել, բայց հանդիպել՝ ինչպես մեզ մոտ են ասում, ջուրծեծոցիի համար... ես գիտեմ դա, անցել եմ այդ ամենի միջով, այնտեղ հղում կա, իմ կարծիքով, Մինսկի համաձայնագրերին,- ասել է Պուտինը։- Ամբողջ գիշեր ձևակերպում էինք այդ Մինսկի համաձայնագրերը, իսկ հետո Գերմանիայի Դաշնային Հանրապետության և Ֆրանսիայի առաջին դեմքերի շուրթերով պարզվեց, մեզ հայտարարվեց, որ դա ընդամենը դատարկ պատմություն էր, Մինսկի բոլոր համաձայնագրերը նվիրված էին միայն մեկ բանի՝ ժամանակ շահելուն, որպեսզի վերազինեն Ուկրաինան»։

«Դե, ինչի՞ս են պետք նման համաձայնագրերը։ Դե, ահա, ես ասում եմ՝ ես հանդիպելու իմաստ չեմ տեսնում, ուկրաինական կողմի համար միակ իմաստը մեր զինված ուժերի առաջխաղացումը կանգնեցնելն է։ Այսքան բան։ Իսկ մեզ պետք են պայմանավորվածություններ ոչ թե կես տարվա, ոչ թե երեք ամսվա, այլ տևական պատմական հեռանկարի համար։ Թող մասնագետներն աշխատեն, ինչ-որ լուծումներ մշակեն, իսկ դրանից հետո կարելի է նաև հանդիպել, ներկա գտնվել... ինչ-որ փաստաթղթերի ստորագրմանը կամ նույնիսկ ինչ-որ բան ստորագրել, բայց նախ պետք է լուծումը գտնել»,- ընդգծել է նա։

«Եվ ահա այստեղ ամենակարևորը, և լսարանն ինձ կհասկանա, հատկապես ռուսականը, դա, եթե չեմ սխալվում, մայիսի 21-ին էր,- ուշադրություն է հրավիրել Պուտինը։ - Իսկ մայիսի 22-ին ուկրաինական զորքերը սարսափելի ահաբեկչական հարված հասցրեցին Լուգանսկի Ժողովրդական Հանրապետության քոլեջի հանրակացարանին, որտեղ երեխաներ, դեռահասներ զոհվեցին։ Դա սարսափելի հանցագործություն է»։