ԵԱՏՄ-ն չի հանդուրժի Հայաստանի դիրքորոշումը. Մարիա Զախարովա

Ռուսաստանի արտաքին գործերի նախարարության խոսնակ Մարիա Զախարովան հայտարարել է, որ Եվրասիական տնտեսական միությունը չի հանդուրժի Հայաստանի դիրքորոշումը, եթե այն միաժամանակ օգտվի ԵՏՄ-ի առավելություններից և միաժամանակ առաջ մղի իր եվրոպական ինտեգրման ուղին։

Նրա խոսքով՝ անհնար է եվրասիական ինտեգրացիայից արտոնյալ վերաբերմունք ստանալ՝ միաժամանակ պատրաստվելով միանալ մեկ այլ տնտեսական բլոկի։

Մեկնաբանելով Հայաստանում եվրոպական ընտրության մասին քննարկումները՝ Զախարովան ընդգծել է, որ Եվրամիությունը, իր ներկայիս տեսքով անկարող է երկրին առաջարկել որևէ իրական տնտեսական օգուտ։

«Ի վերջո, Եվրամիությունն իր ներկայիս տեսքով անկարող է իր գործընկերներին առաջարկել որևէ այլ բան, քան տնտեսական լճացում, բացարձակապես անմիտ սպառազինությունների մրցավազք և չափազանց վտանգավոր արտաքին քաղաքական արկածներ», - ասել է նա։

Իր գնահատմամբ՝ Եվրամիությունը պատրաստ չէ Հայաստանին տրամադրել թեկնածուի կարգավիճակ և, ըստ էության, այն չի դիտարկում որպես անդամակցության մոտ հավակնորդ, մինչդեռ ԵՄ-ի հետ մերձեցման մասին պաշտոնական հայտարարությունները, նրա խոսքերով, մնում են քաղաքական հռետորաբանություն։