Պահը վաղուց է հասունացել, սին հույսերով չեք խաբի. եթե այս պահին ոչինչ չարեցիք, ապա հետո էլ ոչինչ չի լինի

«Այս ընտրությունները չեն կարող համարվել լեգիտիմ»։ Այս մասին հայտարարել է «Հայաստան» դաշինքի առաջնորդ, ՀՀ 2-րդ նախագահ Ռոբերտ Քոչարյանը:

Ու, չնայած այս հայտարարությանը, այսինքն՝ հասկանալով, որ ընտրություններն անօրինակ են և, հետևաբար, նոր ձևավորվող խորհրդարանը ևս լեգիտիմ չէ, նա դեմ չէ վերցնել մանդատները: Այսինքն՝ Քոչարյանը համաձայն է անգամ  անօրինական ճանապարհով ձևավորված խորհրդարանի մաս կազմել, քանի որ, ըստ նրա,  «մանդատները լուրջ գործիք են պայքարը շարունակելու համար»:

Այդ պայքարը, նրա խոսքով, ուղղված է լինելու իշխանության հեռացմանը:

Իհարկե, ՀՀ երկրորդ նախագահը ճիշտ կլիներ, եթե հաշվի առներ մի փոքր «նյուանս». այդ մանդատները գուցե կարող էին գործիք հանդիսանալ, եթե դրանց քանակը կշիռ ունենար: Սակայն, այս պարագայում, անգամ միասնական ընդդիմության ձայները՝ «Ուժեղ Հայաստան» կուսակցության հետ, բավարար մանդատներ  չեն ապահովում որևէ հարց լուծելու համար: Անգամ, եթե իշխանությունը «թույլ տա» խորհրդարան մտնել «Բարգավաճ Հայաստան»-ին, ապա միևնույնն է՝ այս դեպքում ևս այդ մանդատները եղած-չեղածի հաշիվ են լինելու:

 Սա իր հերթին:

Մյուս կողմից էլ, նախորդ 5 տարվա փորձը ցույց է տվել, որ այդ մանդատները չեն ծառայել իրենց նպատակին, ինչպես փորձում է համոզել Ռոբերտ Քոչարյանը:

Մինչդեռ «Հայաստան դաշինքի» վարչապետի թեկնածու Քոչարյանը դարձյալ պնդում և փորձում է վստահեցնել, թե՝ այս անգամ իշխանության հեռացում անպայման լինելու է:

Այսօր, ինչպես նշել է Ռոբերտ Քոչարյանը, պայքարի հնարավորությունն ավելի մեծ է։ Քոչարյանը փոշիացված ձայները ևս գնահատելով, համոզված է, որ դրանց մեծ մասը ընդդիմադիր ձայներ են:

«600 000-ից ավելի... եթե դրա 10 տոկոսն էլ դուրս գա փողոց, բավարար է՝ մեկ տարում այս իշխանության հարցը լուծելու»,- այս համոզմունքն է հայտնել  ՀՀ երկրորդ նախագահը:

Փորձառու նախագահը, իհարկե պրոպորցիոնալ հաշվարկ է արել,  սակայն այդ հաշվարկի մեջ նա մեկ  «նյուանս» ևս հաշվի չի առել. իրենց ձայները փոշիացրած քաղաքացիները պարզապես չեն ցանկացել, որ նախկինները գան, դրա համար էլ նախընտրել են այլընտրանքային տարբերակներ:

Այսինքն, այսպես թե այնպես, իրենց ձայները փոշիացնող քաղաքացիները դուրս չեն գալու փողոց՝ Քոչարյանին իշխանության բերելու համար:

Ու, եթե Ռոբերտ Քոչարյանը սպասում է այդ մադկանց դուրս գալուն հեղափոխություն անելու համար, ապա նրանք դուրս չեն գալու: 

Սա մի կողմից: Մյուս կողմից էլ՝  ՀՀ երկրորդ նախագահի այս խոսքերը մի տեսակ հիշողություններ արթնացրին:

Հիշում եք, չէ՞, երբ 2022 թվականի փետրվարի 17-ին, ասուլիսի ժամանակ նա խոսեց փողոցային պայքարից, լրագրողը հարցրեց, թե՝ ե՞րբ է դա լինելու: Քոչարյանը պատասխանեց. «Դեռ պահը չի հասունացել»: 

Այն ժամանակ էլ դարձյալ նա ասում էր, թե՝ պահը կհասունանա, երբ մեծ  զանգված դուրս գա փողոց:

Իհարկե, բազմահազար մարդիկ եղան փողոցում, բայց Քոչարյանն այն ժամանակ էլ երևի դարձյալ իր պրոպորցիոնալ հաշվարկներն ուներ, ու, քանի որ ըստ այդ հաշվարկների, փողոցում գտնվողների թիվը քիչ էր, ուստի մի քանի օր Երևանի փողոցներում լապտերիկներով, պաստառներով ու դրոշներով զբոսնելուց հետո, բոլորին տուն ուղարկեցին, ու հեղափոխության հարցը այդքանով փակվեց:

Այնպես որ, այս անգամ հասարակությունն արդեն լավ գիտի, թե ինչ է սպասվում իրեն: Այլևս սին հույսերով չեք խաբի: Եթե այս պահին ոչինչ չարեցիք, ապա հետո էլ ոչինչ չի լինի:

Արմինե Մկրտումյան