Սամվել Կարապետյանին «աջակցող» կուսակցությունում հիմնադիրների փախուստ է. Միհրան Պողոսյանի ձախողումը. «Ժողովուրդ»
«Ժողովուրդ» օրաթերթը գրում է.
««Հայոց Համազգային Միասնություն» կուսակցությունը հայտարարություն է տարածել, որ, կարևորելով ազգային միասնությունն ու համատեղ պայքարը հանուն Հայաստանի և Հայկականության, միանում է «Ուժեղ Հայաստան» դաշինքի առաջնորդ Սամվել Կարապետյանի՝ բոլոր ընդդիմադիր ուժերի համախմբման կոչին։
Կուսակցության տարածած հայտարարության մեջ, մասնավորապես, նշված է.
«Մենք ողջունում և աջակցում ենք հետընտրական ընդդիմադիր կոալիցիայի ձևավորման գործընթացը՝ …Ուժը միասնության մեջ է»։
Իսկ ո՞վ է այս կուսակցության հիմնադիրը։ «Ժողովուրդ» օրաթերթի տեղեկություններով՝ կուսակցությունը, որի անունից քաղաքական գործընթացներում հանդես է գալիս Հայաստանի կողմից հետախուզման մեջ գտնվող նախկին պաշտոնյա Միհրան Պողոսյանը, փաստացի հայտնվել է լուրջ խնդիրների առաջ. կուսակցության հիմնադիր կազմից մոտ 100 քաղաքացիներ արդեն հեռացել են կուսակցությունից։
«Ժողովուրդ» օրաթերթի աղբյուրների փոխանցմամբ՝ հեռացումների հիմնական պատճառը եղել է այն, որ Միհրան Պողոսյանը քաղաքական գործունեության կազմակերպման, կուսակցական կառուցվածքների ձևավորման և ընթացիկ աշխատանքների համար անհրաժեշտ ծախսերի հետ կապված մի շարք խոստումներ է տվել մարդկանց ու այդպես էլ չի կատարել։ Կարճ ասած՝ փողերը չի տվել։
Քաղաքական շրջանակներում երեկվանից քննարկում են, որ «Հայոց Համազգային Միասնություն» կուսակցության հայտարարությունը, հաշվի առնելով կուսակցության ներսում առկա դժգոհություններն ու Միհրան Պողոսյանի ցածր վարկանիշը, ընդդիմադիր շարժմանը միանալու մասին Սամվել Կարապետյանի նախաձեռնության համար կարող է ավելի շատ խնդիրներ ստեղծել, քան քաղաքական օգուտ բերել։ Ի վերջո, ընդդիմադիր շարժումների ձախողումների պատճառներից մեկը հաճախ հենց այն է եղել, որ դրանց շուրջ համախմբվել են ոչ թե հանրային վստահություն վայելող ուժեր, այլ քաղաքական կենսագրության և հեղինակության հետ կապված ծանր բեռ ունեցող դեմքեր ու խմբեր, ինչի հետևանքով վնասվել է նաև ամբողջ շարժման ընկալումը հանրության շրջանում։ Իսկ Նիկոլ Փաշինյանը լավագույնս է օգտագործում նման օդիոզ կերպարների ներգրավումը ընդդիմադիր շարժումների մեջ»։
Մանրամասները՝ «Ժողովուրդ» օրաթերթի այսօրվա համարում:
