Ընտանեկան բռնությունը՝ հանրային առողջության խնդիր. օրակարգում բուժաշխատողների վերապատրաստման հարցն է

Աշխատանքի և սոցիալական հարցերի նախարարության նախաձեռնությամբ կայացել է Ընտանեկան և կենցաղային բռնության կանխարգելման խորհրդի նիստը․ քննարկվել են ընտանեկան և կենցաղային բռնության դեմ պայքարի շրջանակում առողջապահության ոլորտում ընթացող բարեփոխումներն ու առկա խնդիրները, հայտնում են գերատեսչությունից։

«Նիստի աշխատանքներին մասնակացել են ԱՍՀ նախարարի տեղակալ Տաթևիկ Ստեփանյանը, Առողջապահության նախարարի տեղակալ Արմեն Գասպարյանը, Արդարադատության նախարարի տեղակալ Աննա Կարապետյանը, ՄԱԿ-ի բնակչության հիմնադրամի հայաստանյան գրասենյակի ղեկավար Լուսինե Սարգսյանը, պետական կառույցների, ոլորտային հասարակական և միջազգային կազմակերպությունների ներկայացուցիչներ։

Նախարարի տեղակալ Տաթևիկ Ստեփանյանն իր խոսքում ընդգծել է ոլորտում համակարգված և շարունակական աշխատանքի կարևորությունը՝ նշելով, որ բռնության կանխարգելումը պահանջում է պետական մարմինների, տեղական ինքնակառավարման մարմինների և քաղաքացիական հասարակության սերտ համագործակցություն։ Նա կարևորել է ընտանեկան բռնության ենթարկված անձանց աջակցության ծառայությունների հասանելիության ապահովումը և առաջնային օղակի մասնագետների կարողությունների զարգացումը։

Առողջապահության նախարարի տեղակալ Արմեն Գասպարյանն իր հերթին նշել է, որ ընտանեկան և կենցաղային բռնությունը ոչ միայն սոցիալական և իրավական, այլև հանրային առողջապահական կարևոր խնդիր է, որը կարող է լուրջ հետևանքներ ունենալ անձի ֆիզիկական և հոգեկան առողջության վրա։ Նա կարևորել է բուժաշխատողների դերը բռնության ենթարկված անձանց վաղ հայտնաբերման, անհրաժեշտ բժշկական օգնության տրամադրման և համապատասխան ծառայություններին ուղղորդման գործընթացում։