Ինչու են Հայաստանում խոշոր տրամաչափի կարկտահարության դեպքերը հաճախակի դարձել

«Վերջին 5-6 տարիների ընթացքում, հատկապես Հայաստանի հյուսիսային շրջաններում, մայիս-հունիս ամիսներին արձանագրվում են խոշոր տրամաչափի կարկտահարության դեպքեր, որը պայմանավորված է մթնոլորտի շրջանառության փոփոխությամբ»,- ասուլիսում ասաց «ՀայՀիդրոմետ» ՊՈԱԿ-ի տնօրենի տեղակալ Գագիկ Սուրենյանը։

Նա մանրամասնեց, թե ինչ փոփոխություն կա  մթնոլորտի շրջանառության մեջ. «Հունիսից սկսած սովորաբար Հայաստանում սկսում են գերակշռել արևադարձային տաք օդային հոսանքները, վերջին տարիներին ունենք  միջօրեականի  ուղղությամբ շրջանառություն։

Ի՞նչ է նշանակում միջօրեականի  ուղղությամբ շրջանառություն. հարավից ներթափանցած  տաք օդային ալիքը անմիջապես կարող է ընդհատվել հյուսիսից  ներթափանցող  ցուրտ  օդային հոսանքներով։ Այդ ցուրտ և տաք օդային  հոսնքների բախման արդյունքում առաջանում են մթնոլորտային ճակատներ,  որոնց էլ ցերեկային ժամերին գումարվում է  վերընթաց  հոսանքները, որոնք բերում են նման գերհզոր կույտ անձրևային ամպերի առաջացման, որն էլ իր հեր բերում է խոշոր տրամաչափի կարկուտ»։

Սուրենյանը նաև ասաց, որ վերջին 5-6 տարիներին Հայաստանում հաճախակի են դարձել պտտահողմերի  դեպքերը, որոնք այդքան բնորոշ չեն հայաստանյան կլիմայական պայմաններին։

«Հայաստանի տարբեր հատվածներում՝ Շիրակ, Արագածոտն, Գեղարքունիք, ականատես ենք լինում պտտահողների, որոնք միջին ուժգնությամբ են»,- նշեց նա։