«Ժողովուրդ». 6 անշարժ գույք, 54 մլն դրամ եկամուտ. ինչ է հայտարարագրել Քննչական կոմիտեի նախագահ Արթուր Պողոսյանը
«Ժողովուրդ» օրաթերթը գրում է. «Քննչական կոմիտեի նախագահ Արթուր Պողոսյանի 2021-2025 թվականների հայտարարագրերի ուսումնասիրությունը ցույց է տալիս, որ պաշտոնյան տարիների ընթացքում ունեցել է զգալի ֆինանսական շարժ, անշարժ գույքի աճ և փոփոխվող պարտավորություններ։ «Ժողովուրդ» օրաթերթը ամփոփել է ներկայացված տվյալները՝ ըստ տարիների։
2025 թվականին Արթուր Պողոսյանին պատկանել է ընդհանուր վեց միավոր անշարժ գույք, որոնց թվում են Լոռու մարզի Սպիտակ համայնքում գտնվող հողամասը, Երևանի տարբեր հասցեներում գտնվող երեք ավտոկայանատեղիները, Երևանում գտնվող բնակարանը, որի նկատմամբ ունի 50 տոկոս բաժնային սեփականություն, ինչպես նաև Վանաձորի ավտոտնակը։ Տարվա ընթացքում նա ձեռք է բերել Սպիտակում գտնվող հողամաս՝ վճարելով 3 միլիոն 810 հազար դրամ, իսկ Վանաձորի բնակարաններից մեկը վաճառել է՝ ստանալով 16 միլիոն 830 հազար դրամ։ Նույն տարում նրա եկամուտները կազմել են ավելի քան 54 միլիոն դրամ, որի հիմնական մասը ձևավորվել է աշխատավարձից, գույքի վաճառքից և հարկային վերադարձից։ Դրամական միջոցները տարեվերջին կազմել են ինչպես բանկային ավանդներ և հաշիվներ, այնպես էլ զգալի չափի կանխիկ գումար, ներառյալ 40 հազար ԱՄՆ դոլար։ Վարկերի մարման և գույքի վերանորոգման վրա կատարվել են միլիոնավոր դրամների ծախսեր, իսկ հայտարարագրում առկա է նաև «ԼԱՎ-ՍԱՐ» ՍՊԸ-ին տրամադրված 2 միլիոն 160 հազար դրամի փոխառություն, որը չի վերադարձվել։
Հավելենք, որ հայտարարագրում նշված երեք ավտոկայանատեղիներից մեկի վերաբերյալ պաշտոնյան պարզաբանել է, որ այն, թեև կադաստրային փաստաթղթերով գրանցված է որպես ավտոկայանատեղի, սակայն փաստացի օգտագործվում է որպես 5.5 քմ մակերեսով խորդանոց։
2024 թվականին Պողոսյանին կրկին պատկանել է վեց միավոր անշարժ գույք, սակայն տարվա առանձնահատկությունը եղել է նոր ձեռքբերումները, քանի որ նա գնել է չորս նոր անշարժ գույք՝ երեք ավտոկայանատեղի և մեկ բնակարան՝ 50 տոկոս բաժնային սեփականությամբ։ Բնակարանի արժեքը կազմել է շուրջ 42 միլիոն 980 հազար դրամ։ Նրա կանխիկ միջոցները տարվա ընթացքում զգալի աճ են գրանցել՝ հասնելով 14 միլիոն դրամի և 5 հազար ԱՄՆ դոլարի։ Եկամուտները կազմել են մոտ 36 միլիոն դրամ, որի մեջ ներառվել են աշխատավարձերը, վարձակալությունից եկամուտը, հարկային վերադարձը և վարկային միջոցները։ Տարեվերջին նրա վարկային պարտավորությունները գերազանցել են 47 միլիոն դրամը, որից մեծ մասը հիփոթեքային պարտավորություն է եղել։
2023 թվականին նրա գույքային կառուցվածքը ավելի սահմանափակ է եղել՝ երկու անշարժ գույք Վանաձորում՝ բնակարան և ավտոտնակ, ինչպես նաև մեկ Honda մակնիշի ավտոմեքենա, որը ձեռք է բերվել 7 միլիոն 800 հազար դրամով։ Այդ տարում նա նաև օգտագործել է Երևանում գտնվող բնակարան, որը սեփականություն չի հանդիսացել։ Նրա ֆինանսական համակարգում պահպանվել են խոշոր փոխառությունները, որոնք ընդհանուր կազմել են ավելի քան 41 միլիոն դրամ։ Եկամուտները կազմել են շուրջ 32 միլիոն դրամ, իսկ վարկային պարտավորությունները հասել են ավելի քան 42 միլիոն դրամի։ Տարվա ընթացքում կատարվել են նաև զգալի ծախսեր՝ վերանորոգման, ավտոմեքենայի ձեռքբերման և վարկերի մարման ուղղությամբ։
2022 թվականին Պողոսյանի եկամուտները կազմել են շուրջ 30.5 միլիոն դրամ։ Այդ ընթացքում աճել են նրա կանխիկ միջոցները՝ դոլարով և դրամով, իսկ բանկային ավանդները տարեվերջին զրոյացվել են։ Նրա անշարժ գույքը մնացել է նույնը՝ Վանաձորի բնակարանն ու ավտոտնակը, և նոր ձեռքբերումներ չեն եղել։ Վարկային պարտավորությունները կազմել են շուրջ 39.5 միլիոն դրամ, իսկ եկամուտները հիմնականում ձևավորվել են պետական աշխատավարձերից և բանկային վարկերից։
2021 թվականին նրա ընդհանուր եկամուտները կազմել են շուրջ 35.7 միլիոն դրամ, որոնց հիմնական աղբյուրներն են եղել պետական մարմիններում ստացած աշխատավարձերը, վարկային միջոցները և գույքի օտարումը։ Նրա անշարժ գույքը ներառել է Վանաձորում գտնվող երկու բնակարան, մեկ ավտոտնակ և Երևանում օգտագործվող բնակարան։ Այդ տարի նա նաև վաճառել է մեկ բնակարան՝ մոտ 8,500 դոլարով։ Կանխիկ միջոցները դոլարով աճել են, իսկ դրամով՝ նվազել։ Վարկային պարտավորությունները կազմել են շուրջ 24.9 միլիոն դրամ, իսկ տարվա ընթացքում պահպանվել է ակտիվ ֆինանսական շարժ և պարտքային բեռ։
Ընդհանուր առմամբ, 2021–2025 թվականների հայտարարագրերը ցույց են տալիս անշարժ գույքի կուտակման, բարձր եկամուտների և միաժամանակ զգալի վարկային պարտավորությունների համադրություն, որտեղ յուրաքանչյուր տարի նկատվում են ինչպես գույքային աճ, այնպես էլ ֆինանսական պարտավորությունների բարձր մակարդակ»։
Առավել մանրամասն թերթի այսօրվա համարում
Ադրբեջանի զորամասերում Սյունիքն ու Վայոց ձորը՝ ամբողջությամբ, Գեղարքունիքն ու Տավուշը՝ մասամբ, ներկա...
«Իրավունք». «Թող ջանները յուղեն». Հուլիսի սկզբին սպասվում են նոր աղմկահարույց ձերբակալություններ. Ով...
Փաշինյանը Ռուսաստան է գնալու
Պրովոկատորնե՛ր, հանգիստ թողեք ինձ, ես ուզում եմ մանդատ վերցնել ու Նիկոլի անձնական օգտագործման գործիք...
«Իրավունք». Հայտնի է՝ ինչ պաշտոն կստանա Վահագն Խաչատուրյանը նոր Կառավարությունում
«Արի ստե արա»․ ինչպես են քաղաքապետարանում իրար գետնին տապալում (տեսանյութ)
Փաշինյանին հեռացնելու համար հետընտրական կոալիցիա է ձեւավորվում. «Հրապարակ»
Եթե Վահագն Հովակիմյանը Փաշինյանի մարդն է, ապա Նունե Հովհաննիսյանը, ես կարծում էի, պետության մարդն էր...
Ընդդիմությունը մանդատների հարցով որոշում ունի. «Հրապարակ»
Ո՞րն է ընդդիմության՝ ՍԴ դիմելու քաղաքական իմաստը, եթե արդյունքներն անբեկանելի են
