Քաղաքացիների աչքին «թոզ փչել» չեք կարողանալու. հունիսի 1-18-ը ՀՀ-ից ԵՄ անդամ երկրներ պտուղ-բանջարեղեն չի արտահանվել. Դանիելյան

Հունիսի 1-ից մինչև 18-ը Հայաստանի Հանրապետությունից ԵՄ անդամ երկրներ պտուղ-բանջարեղեն չի արտահանվել․ հարցմանս ի պատասխան տեղեկացնում են էկոնոմիկայի նախարարությունից՝ հղում անելով ՍԱՏՄ-ին, այս մասին Facebook-ում գրել է ԱԺ «Հայաստան» խմբակցության անդամ Գառնիկ Դանիելյանը։

«Նույն ժամանակահատվածի համար, ըստ էկոնոմիկայի նախարարության, ծաղկի արտահանումը կազմել է 1996․3 հազար հատ և 17․2 տոննա։ Ծաղկի արտահանման ծավալները, ըստ երկրների, հետևյալ քանակությամբ են՝ Վրաստան-15.6 տ․, Բուլղարիա-0.2 տ․, Նիդերլանդներ-0.1 տ․, Ռումինիա-0.7 տ․, ԻԻՀ-0.6 տ․։

Ըստ նույն տեղեկատվության, Ավստրիա է արտահանվել ընդամենը 2000, իսկ Ֆրանսիա՝ 2900 հատ ծաղիկ։

Գրությամբ միաժամանակ հայտնում են, որ ԵՄ անդամ երկրներ արտահանելու նպատակով իրականացվում են ակտիվ աշխատանքներ։

Քանի դեռ դեպի ԵՄ «ընթացող» օրվա իշխանությունները բանակցում են նոր շուկաներ գտնելու ուղղությամբ, հսկայական վնասներ է կրում հայ տնտեսվարողը։

Ծաղիկ արտադրողները հայտնում են, որ ստիպված են թափել օրական հազարավոր ծաղիկներ, քանի որ դրանք այդպես էլ չեն իրացվում ոչ ներքին, ոչ արտաքին շուկաներում։

Այս օրերին տարբեր սուպերմարկետներում նկատում ենք ծաղկի ակցիաներ, որոնք, ըստ ծաղիկ արտադրողների, միայն խոշոր ջերմոցների ծաղիկներ են։

Ի դեպ, Yerkir.am-ի գրավոր հարցմանն ի պատասխան, վարչապետի աշխատակազմից հայտնել են, որ Ֆրանսիայի նախագահ Էմանուել Մակրոնի՝ ՀՀ կատարած պետական այցի կազմակերպման և անցկացման հետ կապված ծախսերը կազմել են 54․360․539 դրամ։

Բյուջեից հսկայական գումարներ են հատկացվել նաև Եվրոպական քաղաքական համայնքի 8-րդ գագաթնաժողովի և ՀՀ-ԵՄ գագաթնաժողովի իրականացման համար։ Ըստ հաշվարկների՝ բոլորը միասին կազմում են մոտ 5 մլն դոլար, և դա դեռ ամբողջը չէ․ ծախսերի մի մասը գաղտնիության անվան տակ չեն հայտնում:

Այս ամենից հետո հարց է առաջանում․ սա՞ է այն գինը, որ պետք է վճարի հայ գյուղացին՝ սրանց հակառուսական շոուների դիմաց։ Տարրական գիտելիքների տեր անձի համար էլ պարզ է, որ նոր շուկաներ նվաճելը ոչ օրերի, այլ տարիների հարց է։

Մինչդեռ, սրանք 8 տարի լինելով իշխանության՝ որևէ քայլ չեն ձեռնարկել արտահանման դիվերսիֆիկացման ուղղությամբ։

Առնվազն 5 տարի է՝ ԱԺ ամբիոնից հարց ենք ուղղում, թե ինչ այլընտրանքային շուկաներ եք փնտրում հայկական արտադրանքի իրացման համար։

Մեր քաղաքացիների աչքին «թոզ փչել» չեք կարողանալու։ Հայ արտադրողն ամեն օր է իր մաշկի վրա զգում ձեր անհեռատես, ապաշնորհ քաղաքականության աղետալի հետևանքները»։