ՍԴ բոլոր դատավորները, բացի մեկից, նշանակված են մի քաղաքական ուժի կողմից, այստեղ խնդիր ենք տեսնում. Օրբելյան

«Մենք բարձրաձայնում ենք՝ ՍԴ-ն բաղկացած է 9 անդամից,  այս հարցի քննության դեպքում ունենում ենք իրավիճակ, որոշում կայացնելու են 7 հոգի։ Կարող է հայտնվենք մի իրավիճակում, լրիվ օբյեկտիվ  իրավիճակ է, որտեղ չկարողանան որոշում կայացնել»,- ՍԴ-ում  հունիսի 7-ին կայացած ԱԺ հերթական ընտրությունների արդյունքները վիճարկող 7 քաղաքական ուժերի դիմումների հիման վրա միացված գործի քննության ընդմիջման ժամանակ լրագրողներին ասաց փաստաբան, ԲՀԿ ներկայացուցիչ Արամ Օրբելյանը։

Նա նշեց, որ  պետք է որոշում կայացվի 5 հոգով. «Եթե  որոշեն բավարարել՝ 5 կողմ պետք է լինի, որոշեն մերժել՝ 5 կողմ պետք է լինի։ Կարող է այս դեպքում լինի 3-4։ Ուղղակիորեն սահմանված է ձեռնպահ մնալու արգելք։ Արդյունքում այս խնդիրն առաջանում է։

Երկուսի դեպքում էլ անհրաժեշտ է 5 ձայն։ Եթե վերջում ստացվի՝ 3-4, ու չենք կարողանալու ավարտել, վեադառնալու ենք այս հարցին։ Ես ակնկալում եմ, որ լինելու է 7-0 կամ 6-1, դե 1 հոգի էլ դեմ պետք է լինի»։

«Մեր միջնորդությունը հետևյալն էր. ոչ թե պետք է դատարանի կազմը կրճատվի, այսինքն դատավորների անհնարինություն լինի, այլ պետք է ամբողջ կազմով գործի, դատավորները պետք է փորձեն դրա շրջանակներում ապահովեն իրենց անաչառությունը, մնացած դատավորները պետք է հաշվի առնեն պոտենցիալ  կապերը, իրենց քննարկումների ժամանակ դա հաշվի առնելով՝ որոշում կայացնեն»,- ասաց Օրբելյանը։ 

Նա նշեց, որ Սահմանադրական դատարանի այսօրվա կազմի հետ կապված խնդիր են տեսնում. «Բոլոր դատավորները, բացի ՍԴ նախագահ Արման Դիլանյանից, նշանակված են մեկ քաղաքական ուժի ժամանակ։ Նման իրավիճակ ունեցել ենք 1995 թվականին, երբ որ ձևավորվել էր։ 2020 թվականից հետո փոփոխությունների արդյունքում բոլոր դատավորները նշանակված են մի քաղաքական ուժի կողմից։ Այստեղ մենք տեսնում ենք խնդիր, բայց դատարան չլինելը միշտ ավելի վատ է, քան վատ դատարան ունենալը»։