Շվեդ նախարարը 3 ամսական երեխայի հետ է ներկայացել ԵՄ նիստի. նորածինը մոր ելույթի ժամանակ լացել է (տեսանյութ)
Շվեդիայի կլիմայի նախարար Ռոմինա Պուրմոխտարին իր որդու՝ Ադամի հետ է մասնակցել Լյուքսեմբուրգում կայացած ԵՄ խորհրդի նիստին` ընդգծելու ծնողական արձակուրդի քաղաքականության առավելությունները, որոնք կանանց չեն ստիպում ընտրություն կատարել աշխատանքի և ընտանեկան պարտականությունների միջև։
«Ես ուզում էի իմ օրինակով ցույց տալ, որ պետք չէ այդպիսի ընտրություն կատարել։ Ինչը, իհարկե, պահանջում է զուգընկեր, որը դինոզավր չէ, մեկը, ով բավականին ժամանակակից է և պատրաստ է դրան հետևել», - ասել է Պուրմոխտարին Reuters-ին։
ԵՄ խորհրդի պաշտոնյան հաստատել է` սա առաջին դեպքն է, որ նորածին երեխա է միացել ԵՄ նախարարների հանդիպմանը։
30-ամյա Պուրմոխտարին Շվեդիայի պատմության մեջ ամենաերիտասարդ նախարարն էր, երբ 2022 թվականին պաշտոնը ստանձնեց: Նա նոր է վերադարձել երեխայի խնամքի արձակուրդից, մինչդեռ ամուսինը արձակուրդում կմնա մինչև սեպտեմբեր Շվեդիայում կայանալիք ընտրությունները։ Նրա ամուսինը մեկնել էր Լյուքսեմբուրգ՝ Ադամին խնամելու համար։
Շվեդիայում ծնողները ընդհանուր առմամբ ստանում են մոտ 16 ամիս վճարովի արձակուրդ։ Դրանից 90 օրը հատկացվում է յուրաքանչյուր ծնողի համար անհատապես և չի կարող փոխանցվել մյուսին։ Եթե ծնողը չի օգտվում իրեն հատկացված մասից, այդ օրերը կորսվում են։
Այս ոչ փոխանցելի ժամանակահատվածները, որոնք հաճախ անվանում են «հայրերի ամիսներ», ներդրվել են՝ հայրերին խրախուսելու ավելի շատ ժամանակ անցկացնելու իրենց երեխաների հետ։
«Դա ստեղծում է մեծ արժեք, որը չպետք է թերագնահատել։ Արժեք, որը միշտ չէ, որ տնտեսական է, բայց, վերջիվերջո, կարող է նաև տնտեսական լինել՝ չունենալով հոգնած աշխատողներ», - ասել է նա՝ անդրադառնալով աշխատանքի և ընտանիքի համատեղման համար պայքարող շատ ծնողների վրա դրված բեռին։
