Հայաստանը Արցախի անվտանգության երաշխավորն է. ՀԱՊԿ-ը պետք է հաշվի նստի դրա հետ

Հայաստանում լրջագույն մտահոգություն կա Ռուսաստանի կողմից Ադրբեջանին զենք վաճառելու վերաբերյալ: Ազգային ժողովում լրագրողների հետ զրույցում այս մասին ասաց ԱԺ ՀՀԿ խմբակցության պատգամավոր, պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանը:

Նա նաև անդրադարձավ այն մոտեցմանը, թե զենքը կարող էր ձեռք բերվել այլ պետություններից, ոչ թե Ռուսաստանից, ու նշեց, որ Հարավայի Կովկասում ռազմաքաղաքական իրավիճակն ունի տարբեր բաղադրիչներ, տարբեր գործոններ, որոնց ամբողջական համադրման արդյունքում պետք է գնահատել` ՀԱՊԿ անդամ պետության նկատմա՞մբ է կիրառվել այդ զենքը, թե ոչ անդամ պետության նկատմամբ:
«Հայաստանի Հանրապետությունը Լեռնային Ղարաբաղի անվտանգության և անկախության երաշխավորն է, և բոլոր այն գործողությունները, այդ թվում նաև ռազմական գործողությունները, որոնք իրականացվել են Լեռնային Ղարաբաղի Հանրապետության դեմ և խաղաղ ժողովրդի նկատմամբ, դա մենք դիտարկում ենք որպես մարտահրավեր և սպառնալիք Հայաստանի Հանրապետության նկատմամբ»,- ասաց Կ. Նահապետյանը:

Պատգամավորը հիշեցրեց, որ Հայաստանի իշխանությունները բացեիբաց և տարբեր ատյաններում հայտարարել են, որ Հայաստանը Լեռնային Ղարաբաղի անվտանգության երաշխավորն է և ՀԱՊԿ անդամ պետությունները, պետք է հաշվի նստեն այս մոտեցման հետ:

Կորյուն Նահապետյանը նաև հավելեց, որ ՀՀ նախագահը խոսել է և իր մտահոգությունն ու ցավն արտահայտել է Ռուսաստանի կողմից Ադրբեջանին հարձակվողական զենք վաճառելու կապակցությամ, հայ պատգամավորները պարբերաբար անդրադարձել են Ադրբեջանին վաճառվող հարձակվողական զենքի խնդրին, նշվել է, որ սպառազինության կուտակումն առաջ է բերելու նաև ռազմական հավասարակշռության խախտման, իսկ աննշան խախտումը հղի է անկանխատեսելի ու ծանր հետևանքներով:

«Ռուսաստանի որոշ բարձրաստիճան պաշտոնյաների հայտարարությունները կարող են որոշ դեպքերում վնաս հասցնել հայ-ռուսական ռազմավարական դաշնակցային հարաբերություններին. երկու կողմերն էլ պետք է լինեն շրջահայաց»- ասաց ԱԺ պատգամավորը: