Հոգեբուժական կամ թմրաբանшկան հաստատությունում հաշվառում ունենող մարդկանց շարունակում ենք վարորդական իրավունք տալ. ՆԳ նախարար

Armed-ի հետ ինտենսիվ կապի բացակայությամբ պայմանավորված շարունակում ենք վարելու իրավունք տալ այն մարդկանց, ովքեր հոգեբուժական կամ թմրաբանական հաստատությունում կարող են հաշվառում ունենալ: Այս մասին Կառավարության նիստի ժամանակ ասել է Ներքին գործերի նախարար Արփինե Սարգսյանը:

«Փոխգործակցություն ենք երաշխավորում Armed-ի հետ, արդեն կկարողանանք ավտոմատ եղանակով բացահայտել վերոնիշյալ հանգամանքները, Armed-ից ազդակ կստանանք ու դա հիմք կհանդիսանա վարորդական իրավունքի դադարման համար»,- նշել է Սարգսյանը:

Անդրադառնալով առաջարկվող նախագծին՝ պաշտպանության նախարար Սուրեն Պապիկյանն էլ կիսվեց իրեն հուզող հարցով. «Ինձ հետևյալ հարցն է հուզում, արդյո՞ք նախագծի շրջանակներում կարգավորվում է այն հարցը, որ պարտադիր ժամկետային զինծառայությունից տարբեր հիվանդություններով ազատված քաղաքացիները կիմանան, որ այսուհետ այն հիվանդությունները, որոնցով իրենք ազատվում են ու որոնք հակացուցված են վարորդական իրավունք ունենալուն, կխանգարեն իրենց ունենալ վարորդական իրավունք: Սա մի կողմից բանակից զորտուղի ճանապարհով ազատվող մարդկանց համար կլինի դաս, որ չեն կարող երբեք մեքենա վարել, և մյուս կողմից էլ այն մարդիկ, ովքեր իրապես հիվանդ են, կիմանան, որ մեքենա վարել չեն կարող»,- ասել է նա: 

Վարչապետ Նիկոլ Փաշինյանն էլ անդրադառնալով փոփոխություններին՝ շեշտեց, եթե մի տեղ արձանագրվել է, որ անձի մոտ այդ պրոբլեմը կա, ուրեմն այդ անձի պրոֆիլում պետք է կարմիր լույս վառի և ավտոմատ արգելք դրվի, որ վերջինս չկարողանա ունենալ վարորդական իրավունք:

Արփինե Սարգսյանը եզրափակելով առաջարվող նախագիծը հավելեց, որ շատ են դեպքերը, երբ պարեկները ճանապարհին հանդիպում են այնպիսի անձանց, ովքեր պլատֆորմով երևում են հոգեկան առողջական խնդիր ունեցող, կամ թմրաբանական հաշվառում ունեցող:

«Այս պահի դրությամբ արդեն ավտոմատ ամբողջովին տվյալները անընդհատ կթվայնացվեն, մեզ հասանելի կդառնան և «կարմիր ազդանշանի» հայտնաբերման դեպքում ավտոմատ կդադարի վարորդական իրավունքը, Armed ուղեգրման ռեժիմով ազդակ ուղարկելու հարց էլ ենք դրել մեր առաջ, որպեսզի որևէ քաղաքացի տեսադաշտից բաց չմնա»: