Մենք ողորմություն չենք խնդրում, մեզ աշխատելու հնարավորություն տվեք․ Երևանի «Արարատ» կոմբինատի աշխատակցուհի

Հուլիսի 13-ին «Երևանի Արարատ կոնյակի-գինու-օղու կոմբինատի» աշխատակիցների բողոքի ակցիայի ժամանակ ձեռնարկության լցնող օպերատոր, արդեն 20 տարի այստեղ աշխատող Ժասմեն Բելզարյանը պատմել է իրավապահների կողմից գործարանի աշխատանքի արգելափակման պատճառով կոլեկտիվի ծանր սոցիալական վիճակի մասին։ Նա ընդգծել է, որ երկու տասնամյակի ընթացքում ղեկավարությունը՝ ի դեմս Գագիկ Ծառուկյանի, աշխատավարձը (որը միջինում կազմում է մոտ 200 հազար դրամ) միշտ վճարել է ժամանակին և ապահովել աշխատանքային հարմարավետ պայմաններ։

«Ես քաղաքականության մեջ չեմ խառնվում և չգիտեմ՝ ինչ է կատարվում երկրում, բայց 20 տարվա մեջ մենք ոչ մի անգամ ուշացում չենք տեսել։ Հիմա այս աշխատավարձի հույսով վարկեր ենք վերցրել, իսկ վաղը վճարման օրն է. ո՞վ է մեր փոխարեն վճարելու։ Ամուսինս առողջական խնդիրների պատճառով չի աշխատում, խնամքիս է 90 տարեկան սկեսուրս, բոլորն էլ խնդիրներ ունեն։ Մենք ողորմություն չենք խնդրում, մենք ուզում ենք մեր գումարը վաստակել ու մեր հարցերը լուծել», — հայտարարել է Բելզարյանը։

Ակցիայի մասնակիցը հավելել է, որ կոլեկտիվը սովոր է իր ձեռնարկությանը և լիովին գոհ է դրանից, ուստի մարդիկ չեն պլանավորում այլ աշխատանք փնտրել։ Նա դիմել է վարչապետ Նիկոլ Փաշինյանին՝ կոչ անելով օպերատիվ կերպով լուծել հարցը և բացել կոմբինատը։

«Մենք չենք ցանկանում քաղաքական ինչ-որ ֆոն ստեղծել, սա պարզապես մեր ուղղակի խնդրանքն ու պահանջն է՝ բացե՛ք գործարանը, որպեսզի դուրս գանք աշխատանքի։ Բայց եթե անհրաժեշտություն առաջանա, մենք բոլորս՝ մինչև վերջին մարդը, կկանգնենք մեր ղեկավարի մեջքին, որովհետև նա միշտ լավ է վերաբերվել մեզ», — եզրափակել է կոմբինատի օպերատորը։