Թաիլանդ-Հայաստան երկկողմ հանդիպման ժամանակ քննարկվել է համագործակցության ընդլայնման հեռանկարները

2026 թվականի հուլիսի 20-25-ը ՀՀ շուկայի վերահսկողության տեսչական մարմնի ղեկավար Արմեն Կոտոլյանի գլխավորած պատվիրակությունը պաշտոնական այցով գտնվել է Թաիլանդի Թագավորությունում (Բանգկոկ)՝ Թաիլանդի Սպառողների պաշտպանության խորհրդի գրասենյակի (OCPB) հրավերով։

Այցի շրջանակում քննարկվել են սպառողների իրավունքների պաշտպանության, ոչ պարենային արտադրանքի անվտանգության, շուկայի վերահսկողության, թվայնացման, էլեկտրոնային առևտրի, նոր տեխնոլոգիաների, այդ թվում՝ արհեստական բանականության կիրառման, ինչպես նաև միջազգային համագործակցության զարգացմանն առնչվող հարցեր։

Արմեն Կոտոլյանի գլխավորած պատվիրակությունը ներկայացրել է Շուկայի վերահսկողության տեսչական մարմնի գործունեությունն ու վերահսկողության հիմնական ուղղությունները, իսկ թաիլանդական կողմը՝ սպառողների պաշտպանության ոլորտում իրականացվող աշխատանքներն ու առկա մարտահրավերները։ Կողմերը քննարկել են վտանգավոր արտադրանքի վերաբերյալ տեղեկատվության փոխանակման, ռիսկերի կառավարման համակարգերի կատարելագործման, մասնագիտական կարողությունների զարգացման և փորձի փոխանակման հնարավորությունները։

Երկկողմ հանդիպման ընթացքում արդրադարձ է կատարվել նաև Հայաստանի և Թաիլանդի միջև համագործակցության ընդլայնման հեռանկարներին, այդ թվում՝ հայկական արտադրանքի մուտքը դեպի ասիական շուկաներ խթանելու հնարավորություններին։

Այցի կարևոր արդյունքներից էր Թաիլանդի Սպառողների պաշտպանության խորհրդի գրասենյակի առաջարկը՝ նախաձեռնելու ՀՀ Շուկայի վերահսկողության տեսչական մարմնի և OCPB-ի միջև համագործակցության հուշագրի ստորագրման գործընթաց։ Քննարկվել է նաև թաիլանդական կողմի հնարավոր այցը Հայաստան՝ համագործակցության հետագա զարգացման նպատակով։

Կողմերը վերահաստատել են պատրաստակամությունը շարունակելու համագործակցությունը՝ նպաստելով արտադրանքի անվտանգության, շուկայի ոլորտներում միջազգային լավագույն փորձի ներդրմանը։