Ի՞նչ ունեցվածք ունի ՍԴ դատավոր Երվանդ Խունդկարյանը․ «Ժողովուրդ»

«Ժողովուրդ» օրաթերթը գրում է.

««Ժողովուրդ» օրաթերթը շարունակում է ուսումնասիրել Սահմանադրական դատարանի դատավորների հայտարարագրերը և դրանք ներկայացնել հանրությանը։ Այս անգամ ուսումնասիրել ենք ՍԴ դատավոր Երվանդ Խունդկարյանի ունեցվածքը։ Երվանդ Խունդկարյանը Սահմանադրական դատարանի դատավորի պաշտոնը զբաղեցնում է 2020 թվականի սեպտեմբերի 18-ից։ Երվանդ Խունդկարյանի 2021-2025 թվականների հայտարարագրերի ուսումնասիրությունը ցույց է տալիս, որ այդ ժամանակահատվածում նրա դրամական միջոցները և ֆինանսական պարտավորությունները զգալի փոփոխություններ են ունեցել։ 2021 թվականին նա տարեվերջին հայտարարագրել էր 33 մլն դրամ կանխիկ և ավելի քան 13 մլն դրամ բանկային հաշիվներում, իսկ 2025 թվականին՝ 33 մլն դրամ կանխիկ, շուրջ 38 մլն դրամ բանկային հաշիվներում և 43.1 մլն դրամի հիփոթեքային պարտավորություն։

2021 թվական

2021 թվականի հայտարարագրի համաձայն՝ տարվա սկզբին և վերջում Խունդկարյանի անունով անշարժ գույք չի հայտարարագրվել։ Միաժամանակ, հայտարարագրում նշված է, որ նա տարվա ընթացքում 90 և ավելի օր փաստացի տիրապետել է Երևանի Նոր Նորք վարչական շրջանում գտնվող բնակարանի և ավտոկայանատեղիի։ Դատավորն ունեցել է 2006 թվականի արտադրության Lexus մակնիշի ավտոմեքենա, որը ձեռք է բերել 2014 թվականի մայիսի 5-ին՝ գնման եղանակով։ 2021 թվականին Խունդկարյանի բանկային հաշիվներում տարվա սկզբում առկա է եղել շուրջ 14.31 մլն դրամ և 60 եվրո, իսկ տարեվերջին՝ շուրջ 13.18 մլն դրամ և 52.72 եվրո։ Միաժամանակ, տարվա սկզբում նա հայտարարագրել է 27 մլն դրամ և 6 հազար ԱՄՆ դոլար կանխիկ գումար, իսկ տարեվերջին կանխիկ դրամի չափը հասել է 33 մլն դրամի՝ 6 հազար դոլարը մնալով անփոփոխ։ 2021 թվականի ընթացքում Խունդկարյանի հայտարարագրած ընդհանուր եկամուտը կազմել է 16 մլն 218 հազար 329 դրամ։ Դրանից 15 մլն 543 հազար 389 դրամը ստացել է Սահմանադրական դատարանից՝ որպես աշխատանքի վարձատրություն և դրան հավասարեցված այլ վճարումներ։ «Ինեկոբանկից» նրա հայտարարագրած այլ եկամուտը կազմել է 354 հազար 521 դրամ, Արդարադատության ակադեմիայից ստացել է 272 հազար 300 դրամ, իսկ Երևանի պետական համալսարանից՝ 48 հազար 119 դրամ։

2022 թվական

2022 թվականի հայտարարագրում կրկին անշարժ գույք Խունդկարյանի անունով չի ներկայացվել, սակայն նշվել է, որ նա տարվա ընթացքում առնվազն 90 օր փաստացի տիրապետել է Երևանի Նոր Նորք վարչական շրջանում գտնվող բնակարանի և ավտոկայանատեղիի։ Նույն ժամանակահատվածում նրա անունով եղել է 2006 թվականի արտադրության Lexus-ը, որը ձեռք է բերվել դեռևս 2014 թվականին։ Դատավորի բանկային հաշիվներում 2022 թվականի սկզբում եղել է ընդհանուր շուրջ 13.18 մլն դրամ և 52.72 եվրո, իսկ տարեվերջին՝ շուրջ 17.85 մլն դրամ և 72.28 եվրո։ Կանխիկ միջոցների մասով տարվա սկզբում Խունդկարյանը հայտարարագրել էր 33 մլն դրամ և 6 հազար ԱՄՆ դոլար։ Տարվա վերջում դրամային կանխիկ գումարը նվազել էր մինչև 26 մլն դրամ, իսկ դոլարային միջոցը մնացել էր նույնը՝ 6 հազար դոլար։ 2022 թվականին նրա ընդհանուր հայտարարագրված եկամուտը կազմել է 18 մլն 152 հազար 775 դրամ։ Դրանից 17 մլն 2 հազար 861 դրամը ստացել է Սահմանադրական դատարանից, 530 հազար 598 դրամ՝ Արդարադատության ակադեմիայից, 223 հազար 99 դրամ՝ Երևանի պետական համալսարանից, իսկ «Ինեկոբանկից» հայտարարագրել է 396 հազար 217 դրամ այլ եկամուտ։ Նույն տարում Խունդկարյանը հայտարարագրել է նաև 7 մլն դրամի մեկանգամյա ծախս։

2023 թվական

2023 թվականի հայտարարագրում արդեն անշարժ գույքի մասով նշված է, որ Խունդկարյանը տարվա սկզբում և վերջում ունեցել է Երևանի տարածքում գտնվող բնակարան, որը ձեռք է բերել 1985 թվականի նոյեմբերի 5-ին՝ ժառանգության եղանակով։ Բացի այդ, տարվա ընթացքում նա 90 և ավելի օր փաստացի տիրապետել է նաև ավտոկայանատեղիի։ 2006 թվականի արտադրության Lexus-ը շարունակել է մնալ նրա հայտարարագրած տրանսպորտային միջոցը։ 2023 թվականի սկզբում դատավորի բանկային հաշիվների դրամային մնացորդները կազմել են շուրջ 17.85 մլն դրամ, իսկ տարեվերջին՝ շուրջ 22.54 մլն դրամ։ Այսինքն՝ տարվա ընթացքում բանկային հաշիվներում առկա դրամական միջոցներն աճել են մոտ 4.7 մլն դրամով։ Կանխիկ միջոցների մասով 2023 թվականի սկզբում Խունդկարյանն ունեցել է 26 մլն դրամ և 6 հազար ԱՄՆ դոլար։ Տարեվերջին դրամային կանխիկը հասել է 30 մլն դրամի, իսկ դոլարային միջոցը մնացել է 6 հազար դոլար։ 2023 թվականին նրա հայտարարագրված ընդհանուր եկամուտը կազմել է 22 մլն 339 հազար 916 դրամ։ Հիմնական մասը՝ 20 մլն 681 հազար 461 դրամ, ստացել է Սահմանադրական դատարանից։ Բացի այդ, ՍԴ-ից որպես այլ եկամուտ հայտարարագրվել է 308 հազար 500 դրամ, Արդարադատության ակադեմիայից՝ 661 հազար 607 դրամ, Երևանի պետական համալսարանից՝ 203 հազար 442 դրամ, իսկ «Ինեկոբանկից»՝ 484 հազար 906 դրամ։

2024 թվական

2024 թվականի հայտարարագրում Խունդկարյանի անշարժ գույքի պատկերը էականորեն չի փոխվել։ Նա տարվա սկզբում և վերջում ունեցել է Երևանում գտնվող բնակարան, որը ձեռք է բերել 1985 թվականի նոյեմբերի 5-ին՝ ժառանգության միջոցով։ Միաժամանակ, տարվա ընթացքում 90 և ավելի օր փաստացի տիրապետել է ևս մեկ բնակարանի և ավտոկայանատեղիի։ Նրա անունով շարունակում է մնալ 2006 թվականի արտադրության Lexus ավտոմեքենան։ 2024 թվականի սկզբում բանկային հաշիվներում նրա դրամական միջոցների ընդհանուր մնացորդը կազմել է մոտ 22.54 մլն դրամ, իսկ տարեվերջին՝ մոտ 29.66 մլն դրամ։ Բանկային հաշիվներում առկա են եղել նաև եվրոյով միջոցներ, որոնք տարվա ընթացքում աճել են մոտ 282 եվրոյից մինչև 384 եվրո։ Կանխիկ դրամի մասով տարվա սկզբում Խունդկարյանը հայտարարագրել է 30 մլն դրամ և 6 հազար ԱՄՆ դոլար։ Տարվա վերջին դրամային կանխիկը նվազել է մինչև 25 մլն դրամ, իսկ դոլարը մնացել է 6 հազար։ 2024 թվականի ընթացքում Խունդկարյանի հայտարարագրված ընդհանուր եկամուտը կազմել է 65 մլն 541 հազար 582 դրամ։ Դրանից 19 մլն 240 հազար 211 դրամը ստացել է Սահմանադրական դատարանից՝ աշխատանքի վարձատրության տեսքով։ Արդարադատության ակադեմիայից նրա եկամուտը կազմել է 1 մլն 25 հազար 443 դրամ, Երևանի պետական համալսարանից՝ 127 հազար 380 դրամ։ Միաժամանակ, որպես եկամուտ հայտարարագրվել է «Յունիբանկ» ԲԲԸ-ից ստացված 43 մլն 650 հազար դրամ վարկը։ ՀՀ ֆինանսների նախարարությունից նա ստացել է 258 հազար 971 դրամ եկամտային հարկի վերադարձ, իսկ «Ինեկոբանկից»՝ 626 հազար 429 դրամ այլ եկամուտ։ 2024 թվականի վերջին Խունդկարյանի վարկի մայր գումարի մնացորդը կազմել է 43 մլն 358 հազար 815 դրամ։ Վարկը հիփոթեքային է և կապված է Երևանի Նոր Նորք վարչական շրջանում գտնվող հողամասի վրա կառուցվող բնակելի շենքի բնակարանի հետ։

2025 թվական

2025 թվականի հայտարարագրով Խունդկարյանի դրամական միջոցներն ու ֆինանսական պարտավորություններն ավելի մեծ ծավալ են ունեցել։ Տարվա սկզբում և վերջում նա ունեցել է Երևանում գտնվող բնակարան, որը ձեռք է բերել դեռևս 1985 թվականին՝ ժառանգության եղանակով։ Բացի այդ, հայտարարագրում նշված է, որ տարվա ընթացքում 90 և ավելի օր փաստացի տիրապետել է ևս մեկ բնակարանի և ավտոկայանատեղիի։ 2006 թվականի արտադրության Lexus-ը ևս շարունակում է մնալ նրա հայտարարագրած տրանսպորտային միջոցը։ 2025 թվականին Խունդկարյանի բանկային հաշիվներում տարվա սկզբում առկա դրամական միջոցների ընդհանուր գումարը կազմել է մոտ 29.66 մլն դրամ, իսկ տարեվերջին՝ մոտ 38.02 մլն դրամ։ Բացի այդ, հայտարարագրվել է եվրոյով գումար՝ տարվա սկզբի 60 եվրոյից տարեվերջին հասնելով 52.72 եվրոյի։ Կանխիկ միջոցների մասով տարվա սկզբում և վերջում Խունդկարյանը ունեցել է 6 հազար ԱՄՆ դոլար։ Դրամային կանխիկ գումարը տարվա սկզբի 25 մլն դրամից տարեվերջին հասել է 33 մլն դրամի։ 2025 թվականին նրա հայտարարագրած ընդհանուր եկամուտը կազմել է 26 մլն 415 հազար 390 դրամ։ Դրանից 19 մլն 666 հազար 973 դրամը աշխատանքի վարձատրությունն է Սահմանադրական դատարանից։ Արդարադատության ակադեմիայից նա ստացել է 468 հազար 849 դրամ, Երևանի պետական համալսարանից՝ 211 հազար 980 դրամ, իսկ ՀՀ ֆինանսների նախարարությունից՝ 4 մլն 711 հազար 201 դրամ եկամտային հարկի վերադարձ։ «Ինեկոբանկից» ևս հայտարարագրվել է 468 հազար 168 դրամ եկամուտ։ 2025 թվականի դեկտեմբերի 31-ի դրությամբ Խունդկարյանի հիփոթեքային վարկի մայր գումարի մնացորդը կազմել է 43 մլն 129 հազար 547 դրամ։ Տարվա ընթացքում վարկի մարմանն ուղղված վճարումները կազմել են 5 մլն 900 հազար 641 դրամ։ «Ժողովուրդ» օրաթերթը շարունակում է ուսումնասիրել Սահմանադրական դատարանի դատավորների հայտարարագրերը՝ հանրությանը ներկայացնելով նրանց գույքի, եկամուտների, դրամական միջոցների և ֆինանսական պարտավորությունների փոփոխությունները տարիների կտրվածքով»։

Մանրամասները՝ «Ժողովուրդ» օրաթերթի այսօրվա համարում։