Բյուրեղավանի ջրում՝ «շեղում չկա», բայց մեկ տարում՝ կրկնվող թունավորումներ, հակասական նմուշառումներ և 2 քրեական վարույթ

Մեկ տարվա ընթացքում Բյուրեղավանում արձանագրվել են աղիքային վարակի և թունավորման մի քանի դրվագներ, ջրի տարբեր նմուշառումներով ստացվել են հակասական արդյունքներ, իսկ առնվազն երկու դեպքի առթիվ նախաձեռնվել են քրեական վարույթներ։

2026 թվականին Բյուրեղավանում աղիքային վարակի և թունավորման ախտանշաններով բնակիչների զանգվածային դիմումները մեկ անգամ չէ, որ դարձել են հանրային ուշադրության առարկա։ Դեպքերը կրկնվել են տարվա տարբեր ամիսներին, իսկ դրանցից առնվազն երկուսի առթիվ նախաձեռնվել են քրեական վարույթներ։

Ամեն անգամ նույն հարցն է առաջացել՝ արդյոք մարդկանց հիվանդանալու պատճառը խմելու ջո՞ւրն է։

Պաշտոնական պատասխանն առայժմ չկա։

Ջրի հետազոտությունների պատմությունն ավելի շատ հարցեր է առաջացնում, քան պատասխաններ տալիս։

Առաջին խոշոր դեպքը գրանցվեց այս տարվա ապրիլին։

Բյուրեղավանում տասնյակ քաղաքացիներ դիմեցին բժշկական օգնության, 11-ը հոսպիտալացվեցին։ «Վեոլիա Ջուրը» հայտարարեց, որ իր իրականացրած հետազոտություններով խմելու ջրի որակի շեղումներ չեն հայտնաբերվել։

Սակայն հետագա պետական ուսումնասիրությունները ցույց տվեցին, որ ջրի որոշ նմուշներում հայտնաբերվել են կոլիֆորմ մանրէներ։ Դրանք ինքնին դեռ չեն ապացուցում, որ մարդկանց հիվանդության պատճառը հենց ջուրն է եղել, բայց ջրի մանրէաբանական անվտանգության վերաբերյալ լուրջ հարցեր են առաջացնում։

Հուլիսին իրավիճակը կրկնվեց։

Բյուրեղավանում կրկին տասնյակ քաղաքացիներ աղիքային վարակի ախտանշաններով դիմեցին բուժօգնության։ Եվ կրկին «Վեոլիա Ջուրը» հայտարարեց, որ ջրի որակի շեղումներ չեն արձանագրվել։

Բայց պետական հետագա նմուշառման ժամանակ որոշ նմուշներում կրկին հայտնաբերվեցին մանրէաբանական շեղումներ։ Այսինքն՝ նույն քաղաքի ջրի վերաբերյալ տարբեր ժամանակներում և տարբեր նմուշառումների արդյունքում ստացվել էին տարբեր պատասխաններ։

Սեպտեմբերին արդեն հերթական դեպքն էր։

Բնակիչների՝ աղիքային վարակի ախտանշաններով բժշկական օգնության դիմելուց հետո ՀՎԿԱԿ-ը ժամանակավորապես հորդորեց խուսափել ծորակի ջուրը խմելու և սնունդ պատրաստելու նպատակով օգտագործելուց։ Ավելի ուշ հրապարակված արդյունքներով՝ վերցված ջրի նմուշներում վարակիչ հիվանդությունների հարուցիչներ չէին հայտնաբերվել։ Սակայն համաճարակաբանական ուսումնասիրությունը շարունակվում էր։

Այս ամենի ֆոնին առաջանում է ոչ միայն այն հարցը, թե ջո՞ւրն է մարդկանց հիվանդացրել, այլև՝ ինչո՞ւ են նույն ջրի վերաբերյալ տարբեր հետազոտություններ տարբեր արդյունքներ տալիս։

«Վեոլիա Ջուրը» յուրաքանչյուր դեպքից հետո հղում է անում իր լաբորատոր հետազոտություններին և հայտարարում, որ ջրի որակի շեղումներ չեն հայտնաբերվել։ Սակայն եթե մեկ այլ՝ պետական նմուշառում նույն ժամանակահատվածի կամ նույն տարածքի ջրում հայտնաբերում է մանրէաբանական խնդիր, միայն «շեղում չկա» հայտարարությունը բավարար չէ։

Այստեղ կա նաև մեթոդաբանական խնդիր։ Ջրի աղտոտումը կարող է լինել կարճատև կամ սահմանափակվել ցանցի որոշակի հատվածով։ Նմուշառման ժամը, վայրը, նմուշի պահպանման և հետազոտման պայմանները կարող են ազդել արդյունքի վրա։ Հետևաբար նման իրավիճակում անհրաժեշտ է ոչ թե մեկանգամյա նմուշառում, այլ անկախ և համակարգված ուսումնասիրություն՝ տարբեր հասցեներից ու տարբեր ժամերի։

Բայց Բյուրեղավանի ջրի պատմության մեջ կա ևս մեկ կարևոր հանգամանք։

Սեպտեմբերին Քննչական կոմիտեն հայտնել էր, որ բնակչության շրջանում թունավորման նախկին դեպքերի առթիվ երկու քրեական վարույթ է նախաձեռնվել, որոնք հետագայում միացվել են մեկ վարույթի։ Փորձաքննությունների վերջնական եզրակացությունները դեռ չկային։

Այս պայմաններում դժվար է բնակիչներից պահանջել պարզապես վստահել հերթական պաշտոնական հերքմանը։

Եթե ջուրը կապ չունի հիվանդացության հետ, ապա պետք է պարզել՝ ի՞նչն է պատճառը։ Եթե որոշ նմուշներում հայտնաբերվում են կոլիֆորմ մանրէներ, պետք է պարզել՝ որտեղի՞ց են դրանք հայտնվել։ Իսկ եթե ջրի տարբեր նմուշառումների արդյունքները հակասում են միմյանց, պետք է հրապարակվի՝ ինչո՞վ է պայմանավորված այդ տարբերությունը։

Բյուրեղավանի բնակիչներին այս պահին պետք չէ ևս մեկ հայտարարություն այն մասին, թե՝ «շեղում չի հայտնաբերվել»։ Նրանց պետք է ամբողջական պատասխան՝ հիմնված անկախ լաբորատոր և համաճարակաբանական ուսումնասիրության վրա։

Արմինե Մկրտումյան