Մենք երեխա չենք. Գեյջին կասկածի տակ է դնում Ծառուկյանի խոսքերը

UFC-ի նախկին ժամանակավոր չեմպիոն Ջասթին Գեյջին անդրադարձել է Արման Ծառուկյանի և Իսլամ Մախաչևի միջև չկայացած տիտղոսային մենամարտի աղմկահարույց պատմությանը՝ առաջ քաշելով սեփական վարկածը։

Սպասված մենամարտը պետք է կայանար 2025 թվականի հունվարին, սակայն Ծառուկյանը վերջին պահին՝ մենամարտից անմիջապես առաջ, դուրս եկավ պայքարից՝ որպես պատճառ նշելով մեջքի վնասվածքը։ Սակայն ամերիկացի մարտիկը վստահ է, որ խնդիրն իրականում եղել է քաշի հետ կապված։ Ըստ Գեյջիի՝ Ծառուկյանի գործողությունները ոչ միշտ են արդարացնում տիտղոսի հասնելու նրա հավակնությունները։

«Նա իսկապես մեծ աշխատանք է կատարում տիտղոսային մենամարտ ստանալու համար։ Բայց միաժամանակ թույլ է տալիս քայլեր, որոնք իրեն հեռացնում են այդ նպատակից։ Մենք երեխա չենք»,- Դեմետրիուս Ջոնսոնին տված հարցազրույցում նշել է Գեյջին։

Ամերիկացի մարտիկի կարծիքով՝ հայազգի մարզիկը պարզապես լուրջ դժվարությունների է բախվել քաշը գցելու վերջնական փուլում, ինչն էլ ստիպել է նրան հրաժարվել կռվից։

«Նա պետք է գոտու համար մենամարտեր Մախաչևի հետ, բայց դուրս եկավ պայքարից դրա նախորդ օրը։ Ինձ թվում է՝ Ծառուկյանը պարզապես հասկացավ, որ չի կարողանալու ապահովել անհրաժեշտ քաշը։ Եթե խոսքն իսկապես վնասվածքի մասին լիներ, այն կարտացոլվեր UFC-ի բժշկական զեկույցում, և այլևս ոչ մի հարց չէր առաջանա»,- ընդգծել է Գեյջին։

Ընդ որում, նախկին չեմպիոնը բացառում է այն տեսությունը, թե մեջքի վնասվածքը կարող էր առաջանալ հենց հյուծիչ քաշ գցելու հետևանքով.

«Ես չեմ հավատում, որ նա վնասել է մեջքը քաշ գցելու պատճառով։ Դա ընդհանրապես ինչպե՞ս է հնարավոր։ Կարծում եմ՝ նրա օրգանիզմն ուղղակի հանձնվել է, և քաշն այլևս չի նվազել։ Նման բաներ պատահում են»,- եզրափակել է Գեյջին։

Աղբյուրը՝ Armsport.am: