Խեցգետինը կուլ տվեց ձկանը. ՍԱՊԾ քաղաքականությունը

Օրերս ՀՀ ԳՆ սննդամթերքի անվտանգության պետական ծառայության պետ Արմեն Հայրապետյանը շրջայց է կատարել Արմավիրի, Արարատի և Գեղարքունիքի մարզերի խեցգետնի արտադրությամբ զբաղվող 11 ընկերություններում՝ մշտադիտարկման ընթացքին տեղում ծանոթանալու ու հնարավոր խախտումների ու թերացումների շտկմանն աջակցելու նպատակով:

ՍԱՊԾ պետի հրամանով դիտարկում է իրականացվում Գեղարքունիքի, Արմավիրի և Արարատի տնտեսավորողների մոտ, ովքեր զբաղված են ձկան և ջրային կենդանիների բուծմամբ: Ստուգվելու են ձկան և ջրային կենդանիների ստացված արտադրանքի անասնաբուժասանիտարական անվտանգությունը, սանիտարական կանոններին և հիգիենիկ նորմերին համապատասխանությունը, քննարկել է արտադրությանն ու արտահանմանը, մակնշմանն ու փաթեթավորման ամբողջականությանն առնչվող հարցեր:

Սննդի անվտանգության պետական ծառայության հաղորդագրության մեջ չի նշվում, թե ինչ խախտումներ է արձանագրվել, կամ ինչ շտկումներ են արվել, կամ արվելու: Հաղորդագրության մեջ որևէ կոնկրետ հարցի լուսաբանում չի նշվում, միայն ոչինչ չասող ձևակերպումներ:

Նշենք, որ ձկնարդյունաբերությունն այն ոլորտն է, որը բացի Արարատյան դաշտում արտեզյան ավազանի հասցրած մեծագույն վնասին, նաև աճեցվող ձկնատեսակների որակի հետ կապված խնդիրներ ունի: Մինչև այժմ խորապես ուսումնասիրված չէ, թե այդ ինչ կերատեսակով են սնվում ձկները, որ մի քանի ամսում մեծանում են, իսկ համային հատկանիշները հաճախ է փոփոխված լինում:

Հայաստանի համապատասխան իրացման կետերում իրացվում է համակցված կեր, որը խթանում է ձկան աճը երկու անգամ ավելի արագ, քան բնությամբ նախատեսված կարգով:

ՍԱՊԾ-ն շեշտը դրել է խեցգետնի արտադրությամբ զբաղվող ընկերություների վրա, իսկ ձկնաբուծության ոլորտում սննդի անվտանգության տեսանկյունից խնդիրներ կան, որին ՍԱՊԾ-ն չի անդրադառնում: Կարծես թե կառույցի անհանգստությունը մակնշումն է և հայկական խեցգետնի արտահանումը ԵՄ ու ԵԱՏՄ տարածք, իսկ ոլորտի խորքային խնդիրներին դեռևս կառույցի կողմից անդրադարձ չկա: