«Թատերական Լոռի» 32-րդ փառատոնի վարագույրը բացվեց (լուսանկարներ)

Սեպտեմբերի 26-ին 32-րդ անգամ Ալավերդիում բացվեց «Թատերական Լոռի» միջազգային փառատոնի վարագույրը, որը նվիրված է Հայկական առաջին պրոֆեսիոնալ՝ Թբիլիսիի Պետրոս Ադամյանի անվան պետական դրամատիկական թատրոնի 170-ամյա հոբելյանին։

 

Բացումը թումանյանան մոտիվներով ազդարարեց Ալավերդու դրամատիկական թատրոնը, ապա ելույթ ունեցավ և ներկաներին ողջունեց Ալավերդի համայնքի ղեկավար Դավիթ Ղումաշյանը։ Համայնքի ղեկավարն իր խոսքում կարևորեց այն հանգամանքը, որ փառատոնի բոլոր օրերին Ալավերդին իսկապես տոն ապրում և ամեն երեկո թատրոն շտապող մարդկանց հոծ հոսքը ոչ միայն մշակութային է դարձնում Ալավերդին, այլև ամեն անգամ ապացուցում, որ փառատոնի անցկացման համար համայնքապետարանի կողմից հատկացվող ֆինանսական միջոցները ծառայում են նպատակին և որ 47-ամյա փառատոնը վաղուց այլևս Ալավերդու դիմագծի անբաժանելի մասն է։

 

Այնուհետև ելույթ ունեցավ, ալավերդցիներին և փառատոնի մասնակից թատերախմբերին ողջունեց ՀԹԳՄ նախագահ Հակոբ Ղազանչյանը․ «Թատերական Լոռին, մեր երկրի հնագույն փառատոնն է, ամենաերկարակյացը, հիմնադրվելով 1976 թվականին, անցել է դժվարին բայց զարգացումների փուլ։ Սկսվելով որպես ժողովրդական թատրոնների փառատոն, այն դարձել է պրոֆեսիոնալ թատրոնների փառատոն, վերածվել միջազգային, և այդ ամենը փոքր քաղաքում և այդ ամենը փառատոնի անխոնջ ղեկավար Հրաչյա Պապինյանի ջանքերով, որը փառատոնի 47-ամյա պատմության 37 տարվա ղեկավարն ու կազմակերպիչն է»։ Անկասկած է Ալավերդու համայնքապետարանի դերը։ Համայնքների զարգացման, ասֆալտապատման և բարեկարգման բոլոր ծրագրերն էլ կարևոր են, սակայն Ալավերդու համայնքապետարանն այդ ամենին հավասար կարևորում են հենց թատերական այս փառատոնի անցկացումը, զգալի միջոցներ հատկացնում դրա անցկացմանը, ինչը քիչ հանդիպող երևույթ է և անչափ գովելի։ Այս կերպ Ալավերդին առանձնանում է այլ համայնքների շարքում։

 

2012 թվականից փառատոնի ծրագրով անց է կացվում «Ռուսական թատրոնի օրեր» ենթածրագիրը, որին մասնակցում են ՌԴ, աշխարհի տարբեր երկրներում գործող ռուսալեզու թատրոններ, նաև Հայաստանից։ Փառատոնի Այս ծրագրին աջակցում է «Ռուսկի միր» հիմնադրամը։ Փառատոնի բացմանը ներկա էր և Ռոսսոտրուդնիչեստվոյի երևանյան ներկայացուցրության ղեկավար Վադիմ Ֆեֆիլովը, ով ողջունեց ներկաներին և ընդհանրապես բոլոր մասնակից թատերախմբերին և բոլոր հանդիսականներին, կարևորելով հատկապես փառատոնի միջազգային բնույթը, ինչը համախմբում է տարբեր երկրների թատերական գործիչներին, հնարավորություն տալիս շփվել միմյանց հետ։ Այնուհետև Վադիմ Ֆեֆիլովը հրապարակեց «Ռուսսկի Միր» հիմնադրամի տնօրեն Տատյանա Շլըչկովայի ողջույնի ուղերձը փառատոնի բացման կապակցությամբ և հուշանվեր հանձնեց փառատոնի տնօրենին։ Ելույթ ունեցավ նաև Թբիլիսիի Պետրոս Ադամյանի անվան հայկական պետական թատրոնի գեղարվեստական ղեկավար Արմեն Բայանդուրյանը, ով շնորհակալություն հայտնեց հնամյա փառատոնի 32-րդը իրենց՝ հայկական առաջին պրոֆեսիոնալ թատրոնին հոբելյանին նվիրելու փաստը։ Դեռևս ցարական կայսրության, ապա խորհրդային տարիներին Լոռին և մասնավորապես Ալավերդին ընդգրկված էին Թբիլիսիի հայկական թատրոնի ամենամյա շրջագայությունների ծրագրում, Ադամյանի, այն ժամանակ Ստեփան Շահումյանի անվան թատրոնի ռեժիսորները բեմադրություններ էին անում Ալավերդիում և լավ է, որ այս կապն այս տարի արտահայտվում է հենց այս կերպ։ Արմեն Բայանդուրյանը նշեց, որ դեկտեմբերի տեղի կունենա իրենց թատրոնի նորակառույց շենքի բացումը, ինչը թատրոնի 170-ամյակի տարում մեծ իրադարձություն է։

 

Փառատոնը «Ինչպես նկարել թռչուն» պլաստիկ ներկայացմամբ բացեց Երևանի մնջախաղի պետական թատրոնը, որի գեղարվեստական ղեկավար Ժիրայր Դադասյանն իր խոսքում կարևորեց մայրաքաղաքային թատրոնների մարզային այցելությունները, ինչը հնարավորութուն է տալիս Երևանի մշակութային ծիրում ընդգրկել նաև մարզերը։

 

«Թատերական Լոռին» մեր երկրի ամենահնագույն փառատոնն է, հիմնադրվել է 1976 թ․ Ալավերդի համայնքի Ակներ գյուղում, վաստակաշատ մշակույթի գործիչներ Կոլյա Կոնինյանի, Ռուբեն Հակոբյանի և Ռուսլան Սադաղյանի նախաձեռնությամբ։

 

1983 թվականից Վալերի Պարանյանի նախաձեռնությամբ անցկացվել է Ալավերդի քաղաքում, իսկ 2006 թվականից Լոռու մարզի հինգ քաղաքներում և Տավուշի մարզի Նոյեմբերյան քաղաքում։ Փառատոնի ակունքներում կանգնած են նաև ԽՍՀՄ ժողովրդական արտիստ Հրաչյա Ղափլանյանը, ՀՀ ժողովրդական արտիստ Երվանդ Ղազանչյանը։

 

Այս տարի «Թատերական Լոռիին» մասնակցության հայտ են ներկայացրել 35 թատրոն, ընտրվել է 20-ը՝ մայրաքաղաքից, Գյումրիից, Հրազդանից, Դաղստանից, Սերբիայից, Ուզբեկստանից և այլն։ Փառատոնը կավարտվի հոկտեմբերի 15-ին։ Ընդհանուր առմամբ Ալավերդի և Վանաձոր քաղաքներում կխաղացվի 25 ներկայացում։