Թոշակները նվազագույնը կավելանան 500 դրամով, առավելագույնը՝ 1200 դամով. ՀՀ ԱԲՆ պաշտոնյա

«Նախագծերի փաթեթով է առաջարկվող կարգավորումը, քանի որ թաղման նպաստի հետ կապված մի քանի կարգավորում կա»,-«Արմենպրեսի» մամուլի սրահում ասաց ՀՀ աշխատանքի և բարեկեցության նախարարության կենսաթոշակային ապահովության և այլ վճարների քաղաքականության վարչության պետ Անահիտ Գալստյանը։

Նա հայտնեց, որ Պետական նպաստի մասին օրենքում փոփոխությունների նախագծով վերանայվում է թաղման նպաստի համակարգը։

Գալստյանի խոսքով, գործող օրենսդրությամբ թաղման նպաստի իրավունք ունի այն անձը, որը ապահովում է կենսաթոշակառուի, անապահովության նպաստ ստացողի համակարգում ընդգրկված ընտանիքի անձի հուղարկավորությունը։

«Նոր կարգավորումներով նախատեսվում է, որ թաղման նպաստ տրամադրվի միայն անապահովության նպաստ ստացող ընտանիքի անդամի մահվան դեպքում հուղարկավորությունը կատարած անձին»,- ասաց Գալստյանըր, հավելելով, որ թաղման նպաստը կտրվի Հայաստանում մահացած և հուղարկավորված անձին, շարունակեց.

«Սա հնարավորություն կտա առցանց դիմումներով իրացնել թաղման նպաստի ստացման իրավունքը»։

Պաշտոնյան տեղեկցրեց, որ թաղման նպաստը տրամադրվում է երկու օրվա ընթացքում և ցանկանում են վարչարարությունն այնպես իրականացնել, որ այդ ժամկետը կրճատվի, իսկ նոր համակարգը գործելու է 2027 թվականի հունվարի 1-ից։

Անահիտ Գալստյանը հայտնեց, որ դրան զուգահեռ շրջանառվում է կառավարության որոշման նախագիծ  և թաղման նպաստների կրճատման արդյունքում խնայված 4.3-4.4 մլրդ  դրամին կավելացվի 1.2 մլրդ և 5.6 մլրդը կուղղվի կենսաթոշակների բարձրացմանը։

Նրա խոսքով՝ աշխատանքային կենսաթոշակները 34.000-ից կդառնա 34.500 դրամ, ցանկացած աշխատանքային կենսաթոշակ առնվազը 500 դրամով պետք է ավելանա։ Նվազագույն կենսաթոշակի չափն 46 հազար դրամից կդառնա 47 հազար դրամ, որը ներառյալ 14 տարվա աշխատանքային ստաժ ունեցողներինն է այն վերաբերում։

 «Նարնք, ովքեր ունե հաշմանդամություն և մինչև 14 տարվա աշխատանքային ստաժ, նրանց թոշակը կավելանա 1100-1200 դրամով, իսկ ավելի շատ ստաժ ունեցողների թոշակները կավելանան 600-700 դրամով»,-ասաց Գալստյանը՝ ամփոփելով. «Թոշակները նվազագույնը կավելանան 500 դրամով, առավելագույնը՝ 1200 դամով։ Երկկողմանի ծնողազուրկների թոշակը կավելանա 2500 դրամով»։

Նա նաև տեղեկացրեց, որ հաշմանդամություն ունեցող զինծառայողների թոշակները կավելանան 1400 դրամով, պարտադիր զինծառայության ժամանակ զոհված, մահացած զինծառայողի ընտանիքին տրվող թոշակը կավելանա 1400 դրամով, իսկ սպայական ու ենթասպայական կազմի թոշակները միջինում կավելանան 1.144 դրամով, իսկ ծերության, հաշմանդամության թոշակները կբարձրանան 1000 դրամով։

Անահիտ Գալստյանը հավելեց, որ փոփոխությունը վերաբերում է  505 հազար աշխատանքային, 136 սոցիալական նպաստ և 39 հազար զինվորական կենսաթոշակ ստացողներին։