Արգիշտին մինչև վերջին շունչը դիմագրավել է հակառակորդին

Կարմիր խաչի միջազգային կոմիտեի և ԵԱՀԿ գործող նախագահի անձնական ներկայացուցչի գրասենյակի միջնորդությամբ, ապրիլի 20-ին, ժամը՝ 16․00-ին, համաձայն Լեռնային Ղարաբաղի Հանրապետության և Ադրբեջանի միջև ձեռք բերված պայմանավորվածությանը, Բաշ Քարվենդ բնակավայրի մոտակայքում ադրբեջանական կողմը ԼՂՀ-ին էր հանձնել զոհված զինծառայող Արգիշտի Հաբոյանի մարմինը: Նրա հորեղբայրը ՝ Սեյրան Գաբոյանը անդրադառնալով հարցին, թե մարմինը խոշտանգված է, թե ոչ նշել էր կարող է ասել միայն, որ մարմնի բոլոր մասերը տեղն են, դին ճանաչելի է, սակայն մյուս հարցերը պետք է պարզի դատաբժշկական փորձաքննությունը:

23-ամյա կապիտան, վաշտի հրամանատար Արգիշտի Գաբոյանը Արթիկի շրջանի Մեծ Մանթաշ գյուղից էր: Newspress.am-ի հետ զրույցում համայնքի ղեկավար Ստյոպա Չոբանյանը ընդգծեց, որ ողջ գյուղը վշտի մեջ է, միևնույն ժամանակ բոլորը հպարտանում են: Համոզված են, որ Արգիշտին մինչև վերջին շունչը դիմագրավել է հակառակորդին, պաշտպանել մարտական ընկերներին ու հայրենիքը. «դեռ մանկուց աչքի ընկել հայրենասիրությամբ , պատահական չէ, որ Վազգեն Սարգսյանի անվան ռազմական ինստիտում է սովորել, իրենց ընտանիքում բոլորն են հայրենասեր, հայրը 1988թ-ց մինչև այսօր հակառակորդի հետ մարտնչում է, զինվորական է: Հպարտանում ենք, որ մեր գյուղում այդպիսի ընտանիքներ կան, Արգիշտին մեր գյուղի պարծանքն է»,- մանրամասնեց Ստյոպա Չոբանյանը:

Նա նաև նշեց, որ Արգիշտին և մարտի դաշտում ընկած մյուս զինվորները հակառակորդին ևս մեկ անգամ ապացուցեցին, որ պատրաստ են հայրենիքի, իրենց ընտանիքները համար նույնիսկ կյանքը զոհել: