51 մարմնի արտաշիրիմում պետք է արվի. Անհետ կործաների հարազատների խնդրանքը

Արցախյան պատերազմներում զոհված ու անհետ կորածների ծնողները, հարազատներն այսօր «Ուժեղ Հայաստան» խմբակցության պատգամավորների հետ հանդիպման եկել են խնդիրների մեծ փաթեթով։

«Մեզ մոտ գրանցված հարցերի մեծ մասը սոցիալական բնույթի են, բայց ցանկանում եմ դրանց ներկայացումը սկսել ոչ սոցիալական հարցերից։ Այստեղ անհատական հարցեր չեն, գլոբալ են։ Առաջին ցավոտ հարցը 2023-ին մեկօրյա պատերազմում մեր զոհված տղաների արտաշիրիմում կատարելու հարցն է»,-խորհրադարանում անցկացվող հանդիպմանն ասաց «Արցախյան երրորդ պատերազմում զոհված և անհայտ կորածների հարազատների միություն» ՀԿ-ի նախագահ Արմեն Ասրյանը։

Նրա խոսքով, այս պահին 51 մարմնի արտաշիրիմում կատարելու անհրաժեշտություն կա։ Նրանք զոհվել են 2023-2024 թվականների ընթացքում, հարազատները չեն կարողացել նրանց մարմինները պատշաճ կերպով հողին հանձնել։

«Այս ուղղությամբ աշխատանքներ տարվում էին, ընդ որում մարդկանց էին ցուցակագրել, խմբեր էին կազմել, որ պետք է մեկնեին, բայց ինչ-ինչ պատճառներով այդ գործընթացն ընդհատվեց ու չկայացավ։ Մեր ծնողների երևի 90 տոկոսի հարազատների, որդիների շիրիմները գտնվում են Արցախում, բայց մենք գիտակցում ենք, որ նրանք ունեն շիրմաքար, հուղարկավորվել են հայկական ավանդույթներով, դրա համար այդ հարցը չենք բարձրացնում։ Բայց 2023-ին զոհվածների հարազատների համար դա անհրաժեշտություն է, բացի այդ խաղաղության դարաշրջան է բացվել»,-ասաց նա։

ՀԿ նախագահի խոսքով, արտաշիրիմում իրականացնելու ուղղությամբ մեծ աշխատանքներ են իրականացվել, ճշտվել են, թե որտեղ են հուղարկավորված ներկաների հարազատները, Արցախի ԱԻՆ-ի նախկին աշխատակիցները պատրաստակամություն էին հայտնել միանալ ծնողներին, օգնել նրանց։

«2-3 փորձ է կատարվել, բոլորն էլ ձախողվել են»,-տեղեկացրեց Ասրյանը։

Ներկաներից մեկը մանրամասնեց, թե ինչո՞ւ են արտաշիրիմում պահանջում 2023-ին զոհվածների հարազատները։

«Հողակույտով թեթև թուրքից ընդամենը թաքցրել ենք։ Կոնկրետ մեզ ասացին, պետությունը պարտավորվում է, կտեղափոխի վերջին զոհերին, դուք ոչ մի բան մի արեք, որովհետև հնարավոր է՝ ձեր աչքի առաջ ձեր հարազատի մարմինը խոշտանգեն։ Խնդրում եմ՝ հարցը բարձրաձայնելուց ուղիղ հարց ուղղեք Փաշինյանին, մենք մի քանի անգամ հարցրել ենք, նույն նամակն ուղարկել ենք ԱԳՆ, ԱԱԾ։ Հիմա չենք կողմնորոշվում՝ ո՞ր կառույցի իրավասության շրջանակում է այդ հարցը»,-ասաց անհետ կորածի հարազատ կինը։