Բրիտանական կենդանաբանական այգում վագրը հոշոտել է տղամարդուն

Բրիտանական Դոնքաստեր քաղաքի մոտակայքում, Yorkshire Wildlife Park վայրի բնության այգում տղամարդը մահացել է վագրի հարձակման հետևանքով, հայտնել է BBC News-ը՝ հղում կատարելով Հարավային Յորքշիրի ոստիկանությանը։

Իրավապահ մարմինների տվյալներով՝ ահազանգը ստացվել է տեղի ժամանակով ժամը 13:35-ին՝ այն բանից հետո, երբ տեղեկացվել է, որ տղամարդը մտել է վագրերի ազատավանդակ։ Կենդանին հարձակվել է նրա վրա, տղամարդը մահացել է դեպքի վայրում։

Ոստիկանությունը հայտնել է, որ մահացածի հարազատներին տեղեկացրել են տեղի ունեցածի մասին։ Նրանց հետ աշխատում են իրավապահ մարմինների աշխատակիցները։

Այգու ներկայացուցիչը ցավակցություն է հայտնել մահացածի ընտանիքին և մտերիմներին։ Նրա խոսքով՝ վարչակազմը համագործակցում է ոստիկանության և այլ իրավասու մարմինների հետ՝ տեղի ունեցածի հանգամանքները պարզելու համար։ Միջադեպի հաջորդ օրը այգին փակ կմնա։

Հարձակումից հետո այցելուներին տարհանել են։ Ոստիկանները շարունակում են աշխատել դեպքի վայրում։ Իրավապահ մարմինների տվյալներով՝ վագրը չի տուժել և մնացել է վանդակում։ Այգու սահմաններից դուրս այցելուների և բնակչության համար վտանգ չկա։

Ոստիկանությունը նաև կոչ է արել օգտատերերին չտարածելհարձակման՝ համացանցում հայտնված տեսագրությունները։

Ավելի վաղ Yorkshire Wildlife Park-ի վարչակազմը հայտնել էր, որ անմիջապես գործի է դրել արտակարգ դեպքերի համար նախատեսված ընթացակարգերը և համագործակցում է իշխանությունների հետ՝ տեղի ունեցածի հանգամանքները պարզելու համար։

Այգին բացվել է 2009 թվականի ապրիլին, վագրերի ազատավանդակը սկսել է գործել 2011 թվականին։ Land of the Tigers անվանումով գոտին կենդանիներին հնարավորություն է տալիս ազատ տեղաշարժվել անտառային և մարգագետնային բուսականությամբ տարածքներով և լողալ ջրվեժ-ավազանում։

Բացի վագրերից, այգում պահվում են առյուծներ, հովազներ, լուսաններ, սպիտակ և գորշ արջեր, ինչպես նաև ծովառյուծներ։