Այս նկարն անպատվության մասին է. Մենուա Սողոմոնյան

«Հայաքվե» նախաձեռնության անդամ, ԵՊՀ նախկին դասախոս Մենուա Սողոմոնյանն անդրադարձել է Նիկոլ Փաշինյանի կնոջ՝ Աննա Հակոբյանի՝ բուհերում մեկնարկած ակցիային՝ լուսանկար հրապարակելով Երևանի պետական համալսարանից։

«ԵՊՀ-ն՝ թվերով (ըստ ԵՊՀ կայքէջի առ 14․10․2026)

- 150․000 շրջանավարտներ- 14․333 ուսանողներ- 2037 դասախոսներ- 913 պրոֆեսոր/դոցենտ- 312 կրթական ծրագրեր- 270 գործընկեր- հիմնադրվել է 1919թ․։Այս թվերն ի ցույց են դնում վերջին հարյուրամյակում հայ ժողովրդի գործադրած ճիգը՝ ունենալու մարդ և պետականություն կերտող բարձրագույն ուսումնական հաստատություն։

Այս թվերն արտահայտում են պատվի այն զգացումը, որն ունի յուրաքանչյուր համալսարանական՝ իրեն մաս համարելով վերոնշյալ թվերով արտահայտված իրականության։

Իսկ ահա այս նկարն անպատվության մասին է։ Անպատվություն պատվի ֆոնին։ Աննա Հակոբյանի ստորագրությամբ էժանագին կուսակցական փիառ արշավի պաստառը Համալսարանի հիմնադիր այրերից մեկի՝ փիլիսոփայության դոկտոր, Երևանի թեմական դպրոցների տեսուչ, Սուրբ Հռիփսիմեի վանահայր, Եղեռնից փրկված որբերի օգնության կազմակերպիչ, Սարդարապատի հերոս, Համալսարանի առաջին՝ պատմալեզվաբանական ֆակուլտետի դեկանի պաշտոնակատար, Համալսարանի դասախոս, Հայաստանի հնությունների պահպանության կոմիտեի համահիմնադիր, Հայաստանի առաջին գիտական հաստատության՝ Պատմամշակութային ինստիտուտի համահիմնադիր, Ռուսաստանի, Ղրիմի և Նոր Նախիջևանի հայոց հոգևոր թեմի, Ամերիկայի հայոց հոգևոր թեմի առաջնորդ, Մեծի Տանն Կիլիկիո կաթողիկոս Գարեգին Հովսեփյանի (կիսանդրու) հայացքի ներքո»,- գրել է Սողոմոնյանը։