Իրանը սպառնացել է հարվածել Պարսից ծոցի տվյալների կենտրոններին և ինտերնետ-մալուխներին՝ պատերազմի վերսկսման դեպքում

Իրանը սպառնացել է հարձակվել Պարսից ծոցի երկրների ստորջրյա ինտերնետային մալուխների, տվյալների կենտրոնների և արհեստական բանականության օբյեկտների վրա, եթե ԱՄՆ-ը վերսկսի ռազմական գործողություններն իսլամական հանրապետության դեմ։ Այս մասին Press TV հեռուստաալիքի հարցազրույցում հայտնել է Իրանի Ազգային անվտանգության բարձրագույն խորհրդի քարտուղար Մոհսեն Ռեզային։

Նրա խոսքով՝ հնարավոր թիրախներ կարող են դառնալ տարածաշրջանում ԱՄՆ-ի հետ կապված տեխնոլոգիական օբյեկտները, այդ թվում՝ Արաբական Միացյալ Էմիրություններում և Հորմուզի նեղուցի մերձակայքում։

Ռեզային թվային ենթակառուցվածքն անվանել է Մերձավոր Արևելքում ամերիկյան տնտեսական ներկայության կարևոր մաս և հայտարարել, որ դրա արժեքը գերազանցում է 2 տրլն դոլարը։ Նա զգուշացրել է, որ նոր հակամարտության դեպքում վտանգի տակ կհայտնվեն ոչ միայն ռազմական օբյեկտներն ու էներգետիկ ենթակառուցվածքը, այլև ինտերնետի, ամպային ծառայությունների և արհեստական բանականության տեխնոլոգիաների աշխատանքն ապահովող համակարգերը։

Ստորջրյա օպտիկամանրաթելային մալուխներն ապահովում են միջազգային ինտերնետ-թրաֆիկի զգալի մասը։ Դրանց միջոցով փոխանցվում են հաղորդագրություններ, տեսազանգեր, կորպորատիվ տվյալներ և ֆինանսական տեղեկություններ։ Առանձին գծերի վնասումը պարտադիր չէ, որ հանգեցնի ինտերնետի լիակատար անջատման․ թրաֆիկը կարելի է վերահասցեավորել այլընտրանքային երթուղիներով։ Սակայն միաժամանակ մի քանի մալուխների վնասման կամ պահուստային հզորությունների պակասի դեպքում հնարավոր են կապի արագության նվազում, ուշացումներ և առանձին ծառայությունների աշխատանքի խափանումներ։

Լրացուցիչ ռիսկ է կապված տվյալների կենտրոնների՝ այն օբյեկտների հետ, որտեղ պահվում և մշակվում են տվյալները և տեղակայվում են ամպային ծառայությունները։ Դրանց աշխատանքի համար անհրաժեշտ են կայուն էլեկտրամատակարարում, հովացում և հուսալի ցանցային կապ։ Այս պայմանների խախտումը կարող է հանգեցնել թվային հարթակների աշխատանքի խափանումների և մեծացնել ընկերությունների ծախսերը։

Պարսից ծոցի երկրները, առաջին հերթին Սաուդյան Արաբիան և ԱՄԷ-ն, ակտիվորեն ներդրումներ են կատարում ամպային տեխնոլոգիաների և արհեստական բանականության ոլորտում՝ ձգտելով դիվերսիֆիկացնել տնտեսությունը և ներգրավել տեխնոլոգիական ընկերությունների։ Այդ պատճառով թվային ենթակառուցվածքի վնասումը կարող է ազդել ոչ միայն կապի, այլև ֆինանսական ծառայությունների, առևտրի և ներդրումային նախագծերի վրա։

Միևնույն ժամանակ, հնարավոր հարձակումների հետևանքները կախված կլինեն նրանից, թե հատկապես որ օբյեկտներն են տուժելու, որքանով են զարգացած պահուստային ցանցերը և արդյոք ընկերությունները կկարողանան տվյալների մշակումը տեղափոխել այլ կենտրոններ։ Թեհրանի այս նախազգուշացումը ինքնին չի նշանակում, որ թվարկված ենթակառուցվածքն արդեն ենթարկվել է հարձակումների։