Հունգարիայի վարչապետը կասկածում է, թե Զելենսկին Բուդապեշտ կժամանի հեղափոխության տարեդարձին

Հունգարիայի վարչապետ Պետեր Մադյարը 444.hu պարբերականի հարցազրույցում կասկածել է, թե Ուկրաինայի նախագահ Վլադիմիր Զելենսկին հոկտեմբերի 23-ին կժամանի Բուդապեշտ՝ չնայած 1956 թվականի հունգարական ապստամբության 70-ամյակին նվիրված միջոցառումներին մասնակցելու հրավերին։

Մադյարի խոսքով՝ նա չի ակնկալում ուկրաինացի առաջնորդի այցը, թեև Կիևը պաշտոնական հրավեր է ստացել։ Հոկտեմբերի 23-ի հանդիսավոր միջոցառումներին հրավիրվել են ավելի քան 100 քաղաքական գործիչներ։ Հրավիրվածների թվում Ռուսաստանի նախագահ Վլադիմիր Պուտինը չկա։

Ավելի վաղ Ուկրաինայի նախագահի գրասենյակի ղեկավարի տեղակալ Իգոր Ժովկվան Euronews-ին հաստատել էր, որ Զելենսկին ստացել է հրավերը։ «Մենք ստացել ենք հրավերը։ Հոկտեմբերի 23-ին տեղի կունենա միջոցառում՝ նվիրված Հունգարական հեղափոխության 70-ամյակին։ Ուկրաինայի նախագահը հրավիրված է մասնակցելու։ Տեսնենք», — ասել է նա։

Միևնույն ժամանակ, Մադյարն ու Զելենսկին պայմանավորվել են շարունակել շփումներն ուրբաթ Բրյուսելում Եվրամիության գագաթնաժողովում ունեցած հանդիպումից հետո։ Հունգարիայի վարչապետը չի բացառել, որ նրանք կարող են հանդիպել ավելի ուշ՝ այս տարի, կամ Կիևում, որտեղից միասին կմեկնեն Բերեգովո, կամ Բուդապեշտում՝ հետագայում ուղևորվելով Ուկրաինայի Անդրկարպատյան մարզի այդ քաղաքը։

Բրյուսելում հանդիպումից հետո Մադյարը X սոցիալական ցանցում գրել է, որ հայտնել է Ուկրաինային լիակատար համերաշխություն շարունակվող ռուսական ներխուժման պայմաններում։ Նրա խոսքով՝ կողմերը պայմանավորվել են շարունակել բանակցությունները նախարարական մակարդակով՝ հատուկ ուշադրություն դարձնելով երկու երկրներում ազգային փոքրամասնությունների վիճակին։

Վարչապետը նաև հայտարարել է, որ Հունգարիան և Ուկրաինան շահագրգռված են քաղաքական և տնտեսական հարաբերությունների համար նոր հիմք ձևավորելու մեջ։

Բուդապեշտի և Կիևի հարաբերությունները մի քանի տարի շարունակ բարդացել էին Ուկրաինայում հունգարական փոքրամասնության իրավունքների և Ուկրաինայի եվրոպական ինտեգրման հարցերի շուրջ տարաձայնությունների պատճառով։ Այս վեճերը բազմիցս խոչընդոտ են դարձել Կիևի՝ ԵՄ անդամակցության ճանապարհին։