Արթուր Վարդանյանի կյանքին վտանգ է սպառնում․ փաստաբանը ահազանգում է նրա առողջական վիճակի մասին

Փաստաբան Սերգեյ Հարությունյանը ահազանգում է, որ «Արմավիր» քրեակատարողական հիմնարկում գտնվող «ՀԱՊ» կուսակցության նախագահ Արթուր Վարդանյանի առողջական վիճակը կտրուկ վատթարացել է, և նրա կյանքին վտանգ է սպառնում։ Փաստաբանի խոսքով՝ Վարդանյանը, չնայած առողջական լուրջ խնդիրներին, անհրաժեշտ բժշկական օգնություն չի ստանում, իսկ իրավասու պետական կառույցներին ուղղված իր դիմումներին ի պատասխան՝ արդյունավետ քայլեր չեն ձեռնարկվել։

«Ինչպես արդեն տեղեկացրել եմ` ստանձնել եմ ՀԱՊ կուսակցության նախագահ Արթուր Վալերիկի Վարդանյանի շահերի պաշտպանությունը, ով գտնվում է Արմավիր ՔԿՀ-ում և ունի առողջական չափազանց լուրջ խնդիրներ, մասնավորապես` Կրոնի հիվանդություն (Crohns disease, գրանուլեմատոզ էնտերիտ), սրտանոթային և վահանաձև գեղձի խնդիրներ, միջողնային մի շարք ճողվածքներ և այլն։ Վերջերս, Արթուր Վարդանյանի մոտ բազմիցս դիտվել են առողջության վատթարացման և սրացման դեպքեր, սակայն նրան չի ցուցաբերվել բժշկական համապատասխան օգնություն, որպես օրինակ նշեմ, որ սույն թվականի սեպտեմբերի 19-ին Արթուր Վարդանյանը արյունահոսել է, արյուն է փսխել, զգացել է ձախ թիակի սուր ցավ և թմրածություն, սակայն շտապ օգնության բրիգադ կանչելու փոխարեն «Արմավիր» ՔԿՀ բուժաշխատողները միայն ցավազրկող Կետոնալ դեղահաբեր են տրամադրել վերջինին, ինչը բժշկագիտությամբ հակացուցված է, քանի որ նշված դեղահաբը ուժեղացնում է արյունահոսությունը: Նշված խնդիրը գրությամբ բարձրաձայնել եմ ՀՀ ԱՆ և ԱԽ նախարարներին և ՀՀ ՄԻՊ-ին` ակնկալելով հրատապ և գործուն քայլեր: Նշված երեք կառույցներից ստացել եմ «իմիտացիոն» բնույթի պատասխաններ, մասնավորապես. ՀՀ ՄԻՊ` տեղյակ ենք, գրություն ենք ուղարկել, ՀՀ ԱՆ` խնդիրը մեր տիրույթում չէ, ԱԽ` վիճակը գնահատվում է բավարար, շարունակում է ստանալ սիմպտոմատիկ, պահպանողական բուժում։

Հայտնում եմ, որ այս ժամանակահատվածում Արթուր Վարդանյանը չի ստացել որևէ բուժում, և որ նրա առողջական վիճակը շատ ավելի է վատթարացել: Ակնհայտ է, որ նրա կյանքին վտանգ է սպառնում. ինչը փաստում են երկարատև տեսակցությունից վերադարձած Արթուր Վարդանյանի կինն ու մի քանի օր առաջ այցելած պատգամավոր Գեղամ Մանուկյանը:

Նշվածը հաշվի առնելով` կրկին անգամ դիմում եմ վերը նշված կառույցներին, հրատապ քայլեր ձեռնարկել` Արթուր Վարդանյանին անհրաժեշտ բժշկական օգնություն ցուցաբերելու և պատժի հետագա կրումից հիվանդության հետևանքով ազատելու համար»,-գրել է նա։