Թանկարժեք F-16-ների փոխարեն. Էստոնիան փնտրում է ավելի մատչելի ինքնաթիռներ դրոնների դեմ պայքարի համար

Էստոնիան քննարկում է թեթև կործանիչների ձեռքբերման հնարավորությունը՝ ռուսական հարվածային անօդաչու թռչող սարքերի դեմ պայքարելու համար, հաղորդել է ERR-ը։

Երկրի պաշտպանության նախարար Մարտին Հերեմի գնահատմամբ՝ համապատասխան հնարավորությունները կարելի է ստեղծել առաջիկա չորս տարվա ընթացքում։ Միևնույն ժամանակ, գնման վերաբերյալ վերջնական որոշում դեռ չի ընդունվել։

Գաղափարը ծագել է Հերեմի՝ Ուկրաինա կատարած այցից հետո։ Նախարարը նշել է, որ Ռուսաստանն էլ ավելի հաճախ է կիրառում ռեակտիվ անօդաչու թռչող սարքեր, որոնք դժվար է որսալ այլ դրոններով և հակաօդային պաշտպանության միջոցներով։ Ուկրաինան դրանց ոչնչացման համար օգտագործում է F-16 կործանիչներ, սակայն Էստոնիայի համար այդ եղանակը չափազանց թանկ է։

«Փոքր կործանիչը միանգամայն տեղին է որոշակի խնդիրների համար։ Բանն այն է, որ արագընթաց կործանիչի համար հեշտ չէ խոցել համեմատաբար դանդաղ թռչող թիրախներ։ Դա իսկապես այդպես է։ Երկրորդ հանգամանքը արժեքն է, որը նույնպես դեր է խաղում», — հայտարարել է Էստոնիայի ռազմաօդային ուժերի նախկին հրամանատար Վելլո Լոեման։

Որպես հնարավոր տարբերակ դիտարկվում են չեխական L-39 ընտանիքի ինքնաթիռները։ Էստոնիան արդեն ունի նման երկու ուսումնամարզական ինքնաթիռ, սակայն դրանք համալրված չեն անօդաչու սարքերի դեմ պայքարի համար նախատեսված սպառազինությամբ։ Տարբերակներից մեկն էլ ավելի ժամանակակից չեխական L-159-ներ են, որոնց արժեքը կազմում է մոտ 10 մլն եվրո մեկ ինքնաթիռի համար։

Լոեմայի խոսքով՝ օդաչուների պատրաստումը, որոնք արդեն ունեն նմանատիպ մեքենաներ կառավարելու փորձ, կարող է տևել մոտ մեկ տարի կամ ավելի քիչ։ Զրոյից ուսուցումը կպահանջի մոտ երկու տարի։ Բացի այդ, կործանիչների գնումը ենթադրում է անհրաժեշտ ենթակառուցվածքի ստեղծում, տեխնիկական սպասարկման կազմակերպում և անձնակազմի պատրաստում։ Հնարավոր լուծումներից մեկը կարող է լինել Բալթյան երկրների կողմից ինքնաթիռների համատեղ ձեռքբերումը։

Հերեմը կարծում է, որ հակաօդային պաշտպանության զարգացումը չպետք է ձգձգել։ Նրա խոսքով՝ եթե Էստոնիան մտադիր է իրականացնել այս նախագիծը, համապատասխան որոշումները պետք է ընդունվեն քառամյա ծրագրի հաստատման ժամանակ, որը պետք է տեղի ունենա մինչև ընթացիկ տարվա վերջ։

Միևնույն ժամանակ, հնարավոր գնման վերլուծությունը դեռ ավարտված չէ։ Ինքնաթիռների տեսակը, դրանց քանակը և ձեռքբերման ընդհանուր արժեքը առայժմ որոշված չեն։