Սատանայի տեսքով հրեշտակները պատասխան են տալու

«Ապրիլի 1-ից հետո իմ ուղեղի մեջ շատ բան է փոխվել, ես հասկացել եմ, որ իրավունք չունեմ սխալվելու: Հայ ժողովուրդը հարություն առավ Արցախում, դրա վկայությունն է միասնությունը: Բոլորը միասնական են, բոլոր հատվածները` ընդդիմություն թե իիշխանություն, մեծ թե փոքր, և բոլորը հասկանում են` մեզնից վերև մեր արարիչն է, իսկ ներքև` մեր հայրենիքն ու արժանապատվությունը»: Սա կարկառուն հանրապետական Շարմազանովի տիտանական մտքերն են:

Իրականում ապրիլի 1-ից հետո շարմազանովները պետք է որ հասկացած լինեն մի խորքային ու ճշմարիտ իրողություն` սահմանը պահում է նա, ով իսկապես հայրենիքն ու այդ հայրենիքի արժանապատվությունը կրողն է, իսկ Շարմազանովի սիրելի կուսակցությունը այս տարիներին կարողացավ բարոյալքել հասարակությանը, հուսալքել ու նվաստացնել, հարկադրաբար տներից քշել, գաղթի ճանապարհը դարձնել պետական ծրագիր, երկիրը պահել սոսկալի աղքատության մեջ ու արժանապատվությունը որպես կրծքանշան խփել իրենց կոստյումին: Ապրիլի 1-ից հետո շարմազանովները պետք է հասկանան, որ ժողովրդին խաբելով ու թալանելով հայրենիք չեն պահում, հայրենիքքը մեր բուշլատով տղերքինն է, ու իրենք են պահում:

Ապրիլի 1-ից հետո շարմազանովները պետք է հասկանան, որ տարիներ շարունակ «բանակ ենք պահում» ասելով բանակ չեն պահում ու 80-ականների զենքն իրենց բենթլիների հետ երեսներիս շպրտում: Ապրիլի 1-ից հետո պետք է հասկանալ, որ հայրենիքը պահում են իսկական հայ մոր արգանդից ծնված տղերքով ու նրանց ոգով: Ապրիլի 1-ից հետ շարմազանովները պիտի հասկանան, որ բանակ չծառայելով ու բանակի մասին մեծ-մեծ խոսելով պարզապես մեր առաջնագիծը պահող զինվորի պատիվն են խլում ու իրենք իրենց ներսում բաժան-բաժան անում: Ապրիլի 1-ից հետո շարմազանովները պետք է հասկանան, որ միասնական լինելով ազգն այսօր իր զինվորին է պահում, քանի որ թիկունքում պետություն չի տեսնում, իսկ այն, որ Շարմազանովը այդքան ոգևորվել է իշխանության և ընդդիմության միասնականությունից, ովքեր տարիներ շարունակ իրենք իրար էլ «գող փիսո», էլ «քաչալ շուն» ու «ավազակապետ» էին անվանում ու հիմա ավազակապետերի բանակը ընդլայնվել է, մեղմ ասած մեր զինվորի փամուշտին չէ, քանի որ հայրենիք պահողի համար սատանայի տեսքով սպիտակ հրեշները մի օր ու շուտով պատասխան են տալու: Իսկապես ապրիլի 1-ից հետո շատ բան պետք է հասկանալ, ու հասկացնել այն, որ արժանապատվությունը լոկ արժեզրկված կրծքանշան չէ, և որ մեզնից վերև մեր Արարիչն է`ու պատասխան ենք տալու: